Almaty oblysy Boraldai kentindegi "Alataý" bazary aýmaǵynda ornalasqan Sushi Time qoǵamdyq tamaqtaný ornynyń qyzmeti ýaqytsha toqtatyldy, dep habarlaidy dalanews.kz.
Jergilikti turǵyndar taǵamnan ýlaný belgilerimen meditsinalyq kómekke jappai júgingen, 19 adam aýrýhanaǵa jatqyzylǵan. Aldyn ala málimet boiynsha olardyń barlyǵy osy mekemeden satyp alynǵan ónimdi tutynǵan.
Alǵashqy shaǵym túskennen keiin oqiǵaǵa sanitariialyq-epidemiologiialyq qyzmet mamandary, densaýlyq saqtaý salasynyń ókilderi jáne jergilikti atqarýshy organdar jumyldyrylǵan.
Qazir Ile aýdandyq sanitariialyq-epidemiologiialyq baqylaý basqarmasy tekseris júrgizip jatyr. Zerthanalyq saraptama úshin taǵamnan synama alynyp, materialdar ýákiletti organdarǵa joldanǵan.
Oqiǵanyń naqty sebebi tekseris aiaqtalyp, zertteý nátijeleri shyqqannnan keiin belgili bolady.
