Túrkistan oblysynda balalardy mektepke elektrondy túrde qabyldaý júıesiniń eńgizilgenine bir jyldan asty. Ondaǵy maqsat – balalardy mektepke ornalastyrýda ashyqtyqty, aıqyndyqty qamtamasyz ete otyryp, adamı faktordyń oryn alýyna jol bermeý bolatyn. Búginde bul maqsatqa tolyqtaı qol jetkizildi desek bolady. Byltyrǵy jyly jańasha júıeniń kómegimen qala mektepteriniń 1-synybyna 21 945 oqýshy qabyldansa, 23 395 búldirshin balabaqshaǵa barýǵa múmkindik alǵan.
– Sıfrlyq bilim berý resýrstaryn damytý arqyly oqytýdyń mazmundylyǵyna, sybaılas jemqorylyqtyń aldyn alýǵa baǵyttalǵan jumystarǵa kóńil bólý máselesi de qolǵa alyndy. Aıtalyq, muǵalimderdi irikteýdegi ashyq konkýrs, oqýshylardyń mekteparalyq aýystyrý jáne jeke is-paraǵyn júrgizý prosesteri elektrondy túrde atqarylýda, – dep oblystyq bilim basqarmasynyń basshysy Isataı Ómirzaquly oıyn ortaǵa salǵan bolatyn.
Bul júıe mektepterdegi oqý-tárbıe isinde de tıimdi paıdalanylýda. Atap aıtsaq, qaladaǵy 40 bilim uıasyna elektrondy basqarý aparattyq-baǵdarlamalyq kesheni engizilgen. Jańasha júıe ornatylǵan mektepterge júrgizilgen taldaý jumystarynyń qorytyndysy boıynsha aldyńǵy jyldarmen salystyrǵanda sońǵy oqý jylynda sabaqtan sebepsiz qalý deńgeıi 75%-ǵa kemip, oqýshylardyń úlgerimi 12%-ǵa paıyzǵa joǵarylaǵan.
Aıta keteıik, jobanyń nátıjesinde, balabaqshaǵa joldama alý, qyzmetke turýda para talap etý, balalardy mektepke ornalastyrýda tamyr-tanystyqqa jol berý týraly narazylyq bildirgen qala turǵyndarynyń aryz-shaǵymdar aıtarlyqtaı tómendegen.
Túrkistan oblysy ákiminiń baspasóz qyzmeti
