Oqý-aǵartý ministrligi pedagogterdi attestattaý qaǵidalaryn qaita qarap, ministrlikte buǵan deiin bekigen buiryqtardy qaita zerdelemek, dep habarlaidy Dalanews.kz.
Buǵan deiin ministrlikke túsken usynystardyń deni attestattaýdan ótý kezinde pedagogterden avtorlyq baǵdarlamalardy ázirleý týraly talapty alyp tastaý bolatyn.
Búginde "pedagog-sheber" biliktilik sanatyna qoiylatyn talaptardyń biri - respýblikalyq oqý-ádistemelik keńes usynǵan avtorlyq baǵdarlamalardy ázirleý jáne tájiribege engizý. Y. Altynsarin atyndaǵy Ulttyq bilim akademiiasy janyndaǵy Saraptama keńesi mektepke deiingi jáne orta bilim berý salasyndaǵy pedagogterdiń avtorlyq baǵdarlamalaryna respýblikalyq deńgeide saraptama júrgizedi.
2025 jyly respýblikalyq saraptamalyq keńes 875 materialdy qarastyrǵan. Onyń ishinde 303 avtorlyq baǵdarlama maquldanyp, 572 avtorlyq baǵdarlama qaita pysyqtaýǵa jiberilgen.
Ministr Juldyz Súleimenova avtorlyq baǵdarlamalardyń kóbi mazmundyq, tehnikalyq talaptarǵa sáikes kelmeitinin, mundai qujattyń talap etilýi pedagogterdiń ýaqytyn tiimsiz jumsaýǵa jáne formalizm kúsheiýine alyp kelgenin alǵa tartty. Maquldanǵan avtorlyq baǵdarlamalardyń tizimi Y.Altynsarin atyndaǵy Ulttyq bilim akademiiasynyń resmi saitynda jariialanǵanymen, baǵdarlamalar bilim berý uiymdarynda keńinen qoldanylmaidy.
"Attestatsiia kezinde pedagogterge qoiylatyn talaptar pedagog qyzmetiniń naqty nátijesine baǵyttalyp, formaldy qujat ainalymyn azaitýy kerek, pedagogterdiń shyǵarmashylyq áleýetin tiimdi paidalanýǵa jáne kásibi sheberlikti baǵalaýdyń sapasyn arttyrýǵa múmkindik berýge tiis", - dedi Juldyz Súleimenova.
Aldaǵy ýaqytta "pedagog-sheber" biliktilik sanatyna qoiylatyn talaptar qatarynan avtorlyq baǵdarlamalardy ázirleýdi alyp tastap, onyń ornyna pedagogtiń kásibi quzyrettiligin naqty ári ádil baǵalaýǵa múmkindik beretin, oqý-tárbie protsesiniń sapasyn arttyrýǵa yqpal etetin balamaly quraldar engizilmek.
