Sýyt habar túskende eń aldymen adam shyǵyny bolmasa eken degen oi keledi – órt sóndirýshi
Osy oraida Ulytaý oblysy, Jezqazǵan qalasyndaǵy №1 mamandandyrylǵan órt-qutqarý bóliminde qyzmet etetin azamattyq qorǵaý aǵa-serjanty, bólimshe komandiri Bekbolat Meiram Temirhanulymen jáne Batys Qazaqstan oblysynyń jedel qutqarý jasaǵynyń №1 qutqarý bólimshesiniń bas qutqarýshysy Taýashev Nurbek Muhitulymen tildesip, tótenshe jaǵdai salasyndaǵy qiyndyqtar men qyzyqtar jaily suradyq.
Bekbolat Meiram Temirhanuly, №1 Mamandandyrylǵan Órt sóndirý bóliminiń órt sóndirýshisi: «Tótenshe jaǵdai qyzmetkeri bolý men úshin úlken abyroi»
– Tótenshe jaǵdailar salasy qiyn bolsa da óz erkińizben, ózińiz tańdap kelgen ekensiz.
– Iá, bul salaǵa óz erkimmen, ózimniń qalaýymmen kelgen bolatynmyn. 2016 jyly osy qyzmetke turdym. Osy mamandyqqa qyzyǵýshylyǵym qatty boldy.
– Tótenshe jaǵdai qyzmetkeri qandai maman bolýy kerek? Ol qandai qasietterge ie bolýy kerek dep esepteisiz?
– Tótenshe jaǵdai qyzmetkeri jan-jaqty maman bolýy kerek. Ol qysqa ýaqytta durys sheshim qabyldai bilip jaýapkershilikti sezinýi kerek. Tótenshe jaǵdai qyzmetkeri bilim jaǵynan da, sport jaǵynan da óte myqty deńgeidegi maman bolýy kerek.
– Tótenshe jaǵdai boiynsha shaqyrý túskende eń birinshi qandai oi keledi? Tótenshe jaǵdai qyzmetkerleri qandai shema boiynsha jumys isteidi?
– Eń aldymen dabyl jáne qońyraý túse sala birden bir ǵana oi keledi. Iaǵni, qutqarýshy retinde «bizge bir adam muqtaj bolyp otyr» dep oilaisyń. Óz basym solai esepteimin. Tótenshe jaǵdai kezinde kez kelgen iste sheshýshi baǵdar boiynsha jumys isteimiz.
– Ómirińizde tótenshe jaǵdaiǵa bailanysty qandai iri oqiǵalarǵa qatystyńyz?
– Jalpy úlken alapat órt shyqqan jerlerde kóp boldym. Mysaly dala órtterinde boldym. Sonymen qatar, Jezqazǵan qalasynyń mys balqytý zaýytynda shyqqan alapat órtte de boi kórsettim. Jezqazǵan qalasynyń jylý elektr ortalyǵynda shyqqan órt kezinde de boldym.
– Qyzmet kezinde este qalǵan bir oqiǵa týraly baiandap bere alasyz ba?
– 2020 jyly qazan aiynda ekinshi quramǵa túsken bolatynbyz. Ol ýaqytta aǵa órtsóndirýshi edim. Qasyma bólimshe komandiry Oraz Erulan Islamuly tústi. Birinshi quramǵa dabyl berilgen bolatyn. Sondyqtan birinshi quram apattyq qutqarý jumystaryna ketip qalǵan edi. Bólimde ekinshi quram ǵana qaldyq.
Bir sátte bizge de dabyl keldi. Bekbolatsai eldimekenine apattyq qutqarý jumystaryna shaqyryldyq. Oqiǵa ornyna kelip jetsek aldymyzdan áiel adam shyǵyp, janushyra kómek surady. Jaǵdaidy kórip, baqylap, úige kirdik. Ol jerde jertóle opyrylyp, úlken áiel adam qabyrǵanyń astynda qalǵan eken. Sol áiel adamdy 3-4 adam alyp shyqqan bolatynbyz.
– Tótenshe jaǵdai kezinde azamattar birinshi ne isteýi qajet: órt kezinde, sýyqta qalǵanda, t.b. jaǵdailarda, jeke-jeke keńes bere alasyz ba?
– Órt kezinde eń aldymen ózińiz dalaǵa shyǵyp ketýge tyrysqanyńyz jón. Artynsha 101-ge qońyraý shalyp, kómekke shaqyrý kerek. Sonymen qatar, esikterdi ashyq qaldyrýǵa bolmaidy. Sebebi órttiń tarap ketýine úsh nárse ǵana kerek: ol janǵysh zat, aýa jáne ushqyn. Al eger sýyqta qalsańyz bir orynda turyp qalmai qozǵalyp turý kerek. Meilinshe yq jerdi izdep taýyp, sol jerde turǵanyńyz abzal. Sonymen qatar, sýyqta qalsańyz uiyqtap qalmaý mańyzdy.
– Tótenshe jaǵdai qyzmetkeri bolý siz úshin ne berdi?
– Tótenshe jaǵdai qyzmetkeri bolý men úshin úlken abyroi, úlken jaýapkershilik, Otanǵa qyzmet etý.
Aita keteiik, Bekbolat Meiram 2020 jyly qarasha aiynda Jezqazǵan qalasy boiynsha jastar arasyndaǵy «Úzdik qutqarýshy qyzmetker» atanǵan bolatyn.
Taýashev Nurbek Muhituly, Batys Qazaqstan oblysynyń jedel qutqarý jasaǵynyń №1 qutqarý bólimshesiniń bas qutqarýshysy: «Kishkentaiymnan ainaladaǵy qiyndyqqa dýshar bolǵan jandarǵa kómekke kelýge asyǵatynmyn»
Taǵy bir tótenshe jaǵdai salasynyń qyzmetkeri - Taýashev Nurbek Muhituly. Ol Resei federatsiiasynyń Orynbor oblysy, Býzýlýk aýdany Verhneviaiývka aýylynda dúniege kelgen. Ol 1992 jyly Qazaqstanǵa ata-anasymen oralǵan. 1995-2006 jyldar aralyǵynda Batys Qazaqstan oblysy Qýrailysai aýyly Talap orta mektebinde bilim alǵan.
– Tótenshe jaǵdai qyzmetine qalai kelgen edińiz?
– Tótenshe jaǵdailar qyzmetine 2009 jyly ásker qatarynan oralǵan soń qujat tapsyryp tájiribeden ótip 2010 jyly aqpan aiynda buiryq negizinde Batys Qazaqstan oblysy tótenshe jaǵdailar qyzmetine ornalastym. Tótenshe jaǵdai salasynda qyzmet etý – bala kezgi armanym desem de bolady. Kishkentaiymnan ainaladaǵy qiyndyqqa dýshar bolǵan jandarǵa kómekke kelýge asyǵatynmyn. Osy qyzmette qiyn jaǵdaiǵa tap bolǵan jandarǵa bar kúshimdi aiamai kómek berýge tyrysamyn.
– Kómek surap, habar túsken sátte eń aldymen neni oilaisyz?
– Tótenshe jaǵdai boiynsha habar túskende eń aldymen adam shyǵyny bolmasyn, adamdar aman bolsyn degen oi keledi.
– Qyzmetińizde bolǵan eń aýqymdy apat jaily áńgimelep berseńiz?
– Osy qyzmetimde qatysqan eń iri, masshtabty, este qalǵan oqiǵa 2011 jyly boldy. Sol jyly Batys Qazaqstan oblysy boiynsha bolǵan tabiǵi apat – sý tasqyny bolǵan edi. Eń aýqymdy kólemdegi qutqarý jumystaryn júrgizgen bolatynbyz. Kóptegen adamnyń baspanasyn sý basyp, evakýatsiialaý jumystary toqtaýsyz kúndiz-túni júrgizilgen edi.
– Adam tótenshe jaǵdai kezinde qalai áreket etkeni durys?
– Órt kezinde eń aldymen sabyr saqtap, úreige boi aldyrmai, 112ge habarlasý qajet. Tynys alý joldaryn ylǵaldy matamen jabý qajet. Tez tutanǵysh suiyqtyqtarǵa jolamaǵan jón. Kórshi turǵyndarǵa eskertip, qutqarýshylar kelgenshe qaýipsiz jerge baryp panalaǵan jón.
Kez kelgen tótenshe jaǵdaidyń qaýpi tóngen jaǵdaida eń birinshi úreige boi aldyrmaý qajet. Múmkindiginshe qaýipti jerden alshaq bolyp TJ qyzmetkerlerin kútken abzal. Sonymen qatar, eń durysy – tótenshe jaǵdailardy boldyrmaýdyń aldyn alyp, tótenshe jaǵdailar erejelerin saqtaý qajet.
Áńgimelestken Qýanysh ERMEKOVA
