Túrkistan oblysynda mal dárigerleri alaiaqtyq jasady degen kúdikke ilindi, dep habarlaidy Dalanews.kz
otyrar.kz málimetinshe, Saýran aýdandyq veterinariia bóliminiń veterinariialyq stantsiia qyzmetkerleri alaiaqtyq jasady degen kúdikke ilingen.
Oblys prokýratýrasynyń málimetinshe, kúdiktiler mal sharýashylyǵyn damytýǵa bólingen asa iri mólsherdegi memleket qarjysyn jymqyrǵan. Is sotqa jetken.
"Tergeý barysynda Oranǵai, Jańa Iqan aýyldyq okrýgteriniń veterinarlary men veterinarlyq bekettiń meńgerýshisi 31 sharýa qojalyǵynda is júzinde joq maldar bar ekeni týraly derekter bazasyna jalǵan málimetter engizip, jalpy somasy 271 mln teńge sýbsidiiany jymqyrǵany anyqtaldy", - dedi Túrkistan oblysy prokýrorynyń orynbasary Dosymhan Aitishev.
Stantsiia qyzmetkerleri qoldan qujat jasap, ómirde joq usaq jáne iri qara maldy tirkegen jáne sol arqyly memlekettiń asa iri kólemdegi aqshasyn qoldy qylǵan. Kúdikti retinde 5 adam ustalǵan.
"Is boiynsha 5 adam kúdikti dep tanyldy. Onyń ishinde úsheýi - veterinariia qyzmetkeri. Bireýi - veterinariia stantsiiasynyń meńgerýshisi", - dedi Túrkistan oblysy prokýrorynyń orynbasary Dosymhan Aitishev.
Kúdiktiler jymqyrdy degen 271 million teńge aqshanyń 19 million teńgesi qaitarylǵan. Olardyń 120 million teńge turatyn múlkine tyiym salynǵan. Sot tergeýi bastalǵan.
