Túrkistan oblysynda 552 myń gektar sýarmaly jer bar. Bul – respýblikalyq kórsetkishtiń tórtten bir bóligi. Óńirde ekonomikanyń negizgi salasynyń biri – aýyl sharýashylyǵy. Sondyqtan sý nysandary infraqurylymyn damytý, jóndeý, tazalaý asa ózekti, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Atalǵan baǵyttaǵy jumystar men máseleler oblys ákimdiginde ótken májiliste talqylandy. Túrkistan oblysynyń ákimi Darhan Satybaldy sý únemdeý tehnologiialaryn engizý, sý nysandaryn retke keltirý mańyzdy ekenine toqtalyp, jaýaptylarǵa tiisti tapsyrmalar berdi.
– Jyldan-jylǵa sý tapshylyǵy máselesi qiyndaýda. Sondyqtan sý únemdeý tehnologiialaryn engizý qarqynyn túsirmeý kerek. Oblystaǵy aǵyn sý máselesin sheshetin, sharýalardyń tirlishigine tikelei áser etetin jobalardy jedel júzege asyryp, kanaldardy jóndeý, tazalaý mańyzdy. Kezek kúttirmeitin nysandar boiynsha joba jasap, biýdjetke usynyp, jumysty bastaý qajet. Óńirdegi jeke menshiktegi sý nysandaryn da zerdelep, tiisti usynys berińizder. Ár aýdan, qala ákimi, jaýapty basqarma basshysy tiisti jumys júrgizsin, – dedi Darhan Satybaldy.
Oblystyq aýyl sharýashylyǵy basqarmasynyń basshysy Nurbek Badyraqovtyń aitýynsha, biyl oblystyq biýdjetten jalpy 9,4 mlrd. teńge qarjy qaralyp, 11 sý nysanyna kúrdeli jóndeý jáne 939 shaqyrymdy quraityn qashyrtqylarǵa mehanikalyq tazalaý jumystary júrgizilýde. Nátijesinde 7,8 myń gektar jerdiń sýmen qamtamasyz etilýi jáne 19,1 myń gektar jerdiń meliorativtik jaǵdaiy jaqsarady. «Túrkistan magistraldy kanalyn kúrdeli jóndeý», «Arys magistraldy kanalyn kúrdeli jóndeý», jáne «Qaraspan magistraldy kanalyn kúrdeli jóndeý» jobalary esebinen Túrkistan óńirine qosymsha 233 mln. m3 aǵyn sý jetkizý múmindigi bar. «Túrkistan magistraldy kanalyn kúrdeli jóndeý» jobasynyń 2 kezeńiniń qujattamasy daiyn. Joba quny – 11,5 mlrd. teńge. Joba aiasynda 25 dana sý ótkizý qurylymdary avtomattandyrylady. Sondai-aq 24,9 shaqyrym kanaldy betondaý arqyly jylyna 29 mln. m3 aǵyn sýdy únemdelmek.
Budan bólek, kóktemgi sý tasqynyn aldyn alý jáne sharýalarǵa aǵyn sýdy sapaly jetkizý maqsatynda, «Turan sý» ShJQ MKK teńgerimindegi arnaiy tehnikalar esebinen aýdan, qala aýmaǵyndaǵy jalpy uzyndyǵy 371,5 shaqyrym kanal men 136,7 shaqyrym qashyrtqyǵa mehanikalyq tazalaý jumystary júrgizilgen.
Oblysta sý únemdeý tehnologiialary óndirisin damytý maqsatynda jergilikti 3 kásiporyn iske qosyldy. Joba quny – 12,0 mlrd. teńge. Kásiporyndardyń jyldyq qýattylyǵy – 73 myń gektar.
Jiynda Oblystyq qurylys basqarmasy basshysynyń mindetin atqarýshy Abai Turhanovtyń da esebi tyńdaldy. Óńirde atalǵan basqarmanyń tapsyrysymen jalpy quny 45,7 mlrd. teńgeni quraityn 5 iri sý jobasy iske asyrylýda. 4 nysannyń qurylys jumystary júrgizilýde, 1 nysannyń jobalaý-smetalyq qujattamasy ázirleý barysynda. Onyń ishinde «Báidibek ata» sý qoimasynyń qurylysy júrip jatyr. «Keńsai - Qosqorǵan - 2» sý qoimasynyń da qurylysy da qolǵa alynǵan.
