تۇركىستان وبلىسىندا 552 مىڭ گەكتار سۋارمالى جەر بار. بۇل – رەسپۋبليكالىق كورسەتكىشتىڭ تورتتەن ءبىر بولىگى. وڭىردە ەكونوميكانىڭ نەگىزگى سالاسىنىڭ ءبىرى – اۋىل شارۋاشىلىعى. سوندىقتان سۋ نىساندارى ينفراقۇرىلىمىن دامىتۋ، جوندەۋ، تازالاۋ اسا وزەكتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
اتالعان باعىتتاعى جۇمىستار مەن ماسەلەلەر وبلىس اكىمدىگىندە وتكەن ماجىلىستە تالقىلاندى. تۇركىستان وبلىسىنىڭ اكىمى دارحان ساتىبالدى سۋ ۇنەمدەۋ تەحنولوگيالارىن ەنگىزۋ، سۋ نىساندارىن رەتكە كەلتىرۋ ماڭىزدى ەكەنىنە توقتالىپ، جاۋاپتىلارعا ءتيىستى تاپسىرمالار بەردى.
– جىلدان-جىلعا سۋ تاپشىلىعى ماسەلەسى قيىنداۋدا. سوندىقتان سۋ ۇنەمدەۋ تەحنولوگيالارىن ەنگىزۋ قارقىنىن تۇسىرمەۋ كەرەك. وبلىستاعى اعىن سۋ ماسەلەسىن شەشەتىن، شارۋالاردىڭ تىرلىشىگىنە تىكەلەي اسەر ەتەتىن جوبالاردى جەدەل جۇزەگە اسىرىپ، كانالداردى جوندەۋ، تازالاۋ ماڭىزدى. كەزەك كۇتتىرمەيتىن نىساندار بويىنشا جوبا جاساپ، بيۋدجەتكە ۇسىنىپ، جۇمىستى باستاۋ قاجەت. وڭىردەگى جەكە مەنشىكتەگى سۋ نىساندارىن دا زەردەلەپ، ءتيىستى ۇسىنىس بەرىڭىزدەر. ءار اۋدان، قالا اكىمى، جاۋاپتى باسقارما باسشىسى ءتيىستى جۇمىس جۇرگىزسىن، – دەدى دارحان ساتىبالدى.
وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆتىڭ ايتۋىنشا، بيىل وبلىستىق بيۋدجەتتەن جالپى 9،4 ملرد. تەڭگە قارجى قارالىپ، 11 سۋ نىسانىنا كۇردەلى جوندەۋ جانە 939 شاقىرىمدى قۇرايتىن قاشىرتقىلارعا مەحانيكالىق تازالاۋ جۇمىستارى جۇرگىزىلۋدە. ناتيجەسىندە 7،8 مىڭ گەكتار جەردىڭ سۋمەن قامتاماسىز ەتىلۋى جانە 19،1 مىڭ گەكتار جەردىڭ مەليوراتيۆتىك جاعدايى جاقسارادى. «تۇركىستان ماگيسترالدى كانالىن كۇردەلى جوندەۋ»، «ارىس ماگيسترالدى كانالىن كۇردەلى جوندەۋ»، جانە «قاراسپان ماگيسترالدى كانالىن كۇردەلى جوندەۋ» جوبالارى ەسەبىنەن تۇركىستان وڭىرىنە قوسىمشا 233 ملن. م3 اعىن سۋ جەتكىزۋ مۇمىندىگى بار. «تۇركىستان ماگيسترالدى كانالىن كۇردەلى جوندەۋ» جوباسىنىڭ 2 كەزەڭىنىڭ قۇجاتتاماسى دايىن. جوبا قۇنى – 11،5 ملرد. تەڭگە. جوبا اياسىندا 25 دانا سۋ وتكىزۋ قۇرىلىمدارى اۆتوماتتاندىرىلادى. سونداي-اق 24،9 شاقىرىم كانالدى بەتونداۋ ارقىلى جىلىنا 29 ملن. م3 اعىن سۋدى ۇنەمدەلمەك.
بۇدان بولەك، كوكتەمگى سۋ تاسقىنىن الدىن الۋ جانە شارۋالارعا اعىن سۋدى ساپالى جەتكىزۋ ماقساتىندا، «تۇران سۋ» شجق مكك تەڭگەرىمىندەگى ارنايى تەحنيكالار ەسەبىنەن اۋدان، قالا اۋماعىنداعى جالپى ۇزىندىعى 371،5 شاقىرىم كانال مەن 136،7 شاقىرىم قاشىرتقىعا مەحانيكالىق تازالاۋ جۇمىستارى جۇرگىزىلگەن.
وبلىستا سۋ ۇنەمدەۋ تەحنولوگيالارى ءوندىرىسىن دامىتۋ ماقساتىندا جەرگىلىكتى 3 كاسىپورىن ىسكە قوسىلدى. جوبا قۇنى – 12،0 ملرد. تەڭگە. كاسىپورىنداردىڭ جىلدىق قۋاتتىلىعى – 73 مىڭ گەكتار.
جيىندا وبلىستىق قۇرىلىس باسقارماسى باسشىسىنىڭ مىندەتىن اتقارۋشى اباي تۇرحانوۆتىڭ دا ەسەبى تىڭدالدى. وڭىردە اتالعان باسقارمانىڭ تاپسىرىسىمەن جالپى قۇنى 45،7 ملرد. تەڭگەنى قۇرايتىن 5 ءىرى سۋ جوباسى ىسكە اسىرىلۋدا. 4 نىساننىڭ قۇرىلىس جۇمىستارى جۇرگىزىلۋدە، 1 نىساننىڭ جوبالاۋ-سمەتالىق قۇجاتتاماسى ازىرلەۋ بارىسىندا. ونىڭ ىشىندە «بايدىبەك اتا» سۋ قويماسىنىڭ قۇرىلىسى ءجۇرىپ جاتىر. «كەڭساي - قوسقورعان - 2» سۋ قويماسىنىڭ دا قۇرىلىسى دا قولعا الىنعان.
