Sý tasqynyna qarsy sharalarǵa bólingen qarajatty urlaǵan qaraqshylardyń úkimi kúshinde qaldy, dep habarlaidy Dalanews.kz.
Biyl 7 qarashada Aqmola oblystyq sotynyń apelliatsiialyq alqasy 300 mln teńgeden astam qarajatty jymqyrǵany úshin Atbasar aýdanynyń ákimdigine qarasty qurylys bóliminiń basshysy Qaranaǵaev, «Prestij Stroi 7» jáne «Fýndamental» JShS-niń basshylary Orlov pen Serikbaevqa qatysty sottyń aiyptaý úkimin ózgerissiz qaldyrdy.
Esterińizge sala keteiik, atalǵan qarajattar 2021 jyly Úkimet rezervinen Atbasar aýdanynda sý tasqyny aimaǵynda turatyn 200 januiany kóshirý úshin eki 100 páterli úilerdi salýǵa bólingen.
Is Aqmola oblysy arnaiy prokýrorlarymen tergelgen bolatyn.
Urlyqty uiymdastyrýshy Serikbaev QR QK 189-babynyń 4-bóligi 2)-shi tarmaǵy (talan-tarajǵa salý) boiynsha kásipkerlik qyzmetpen ainalysý quqyǵynan aiyra otyryp, 8 jyl 6 aiǵa bas bostandyǵynan aiyryldy.
Merdiger uiymnyń direktory Orlov QR QK 189-babynyń 4-bóligi 2) tarmaǵy, 218-babynyń 3-bóligi 3) tarmaǵy (talan-tarajǵa salý jáne qylmystyq jolmen alynǵan múlikti zańdastyrý) boiynsha kináli dep tanylyp, 7 jyl 6 aiǵa bas bostandyǵynan aiyrý jazasy taǵaiyndaldy, múlki tárkilenip, barlyq menshik nysanyndaǵy uiymdarda materialdyq-jaýapty laýazymdardy atqarý quqyǵynan aiyryldy.
Atbasar aýdandyq qurylys bóliminiń bastyǵy Qaranaǵaev QR QK 189-babynyń 4-bóliginiń 2) tarmaǵy boiynsha memlekettik qyzmette laýazymdardy atqarý quqyǵynan ómir boiyna aiyra otyryp, 7 jyl 6 aiǵa naqty bas bostandyǵynan aiyryldy.
Aita ketý kerek, sybailas jemqorlyq qylmys jasaǵany úshin sottalǵan adamdar, shartty túrde merziminen buryn bosatylýǵa jatpaidy.
