Premer-ministr Oljas Bektenovtiń tóraǵalyǵymen kóktemgi dala jumystarynyń jáne vegetatsiialyq kezeńniń barysy talqylanǵan Úkimet otyrysy ótti. Qyzylorda oblysynyń ákimi Nurlybek Nálibaev kún tártibindegi máseleler boiynsha baiandama jasady, dep habarlaidy Dalanews.kz
«Biyl Qyzylorda oblysynda 193 700 gektarǵa aýyl sharýashylyǵy daqyldary egiledi. Úkimettiń Jol kartasyna sáikes, kúrish 80 900 gektarǵa josparlanǵan, ótken jylmen salystyrǵanda 4700 gektarǵa qysqartylady. Sharýashylyq qurylymdary tuqymmen tolyq qamtamasyz etilgen, 4046 aýyl sharýashylyǵy tehnikasy jóndelgen, 10 myń tonna dizel kestege sáikes oblysqa jetkizilip, taratylýda. Búginde erte egiletin aýyl sharýashylyǵy daqyldary ornalastyrylyp boldy. Kúrish sebý 21 sáýir kúni bastalyp, búgingi kúni 37500 gektary egildi, 26700 gektary sýǵa bastyryldy.
Aýa raiy erte jylynýyna bailanysty kúrish sebý jumystary da erte bastalyp, egisti sýǵa bastyrý úshin joǵarydan keletin sý kólemi tómendeý bolýda. Sýdy tiimdi paidalanýda 357 nasos qondyrǵy daiyndalyp, onyń 53-i jumys jasap tur, qalǵany qashyrtqyǵa sý tastalǵan soń sýdy ekinshi márte paidalaný úshin iske qosylady. Kúrish alqaptaryn lazerlik tegisteý kólemi 60 myń gektarǵa, al sý únemdeý tehnologiialaryn paidalaný 9200 gektarǵa jetkiziledi.
Qoimalarǵa jinalǵan jáne joǵarydan keletin sýdyń boljamyna sáikes, biyl 3 mlrd 902 mln tekshe metr sý limiti belgilengen. Memleketaralyq sý sharýashylyǵyn úilestirý komissiiasynyń otyrysynda «Shardara» sý qoimasyna joǵarydan qosymsha 3 mlrd 700 mln tekshe metr sý túsýi belgilendi. Mamyr aiynda sekýndyna 330 tekshe metr sý túsýi josparlanǵanymen, búginde 57,6 tekshe metr nemese jospardaǵynyń 17,4%-y ǵana túsýde. 12 mamyrdaǵy jaǵdai boiynsha «Shardara» sý qoimasy men «Kóksarai» sý rettegishindegi sý kólemi 4 mlrd 821 mln tekshe metr, bul byltyrǵydan 700 mln tekshe metrge kem.
Vegetatsiialyq kezeńdi turaqty ótkizý úshin Syrdariia ózeniniń joǵary aǵysynda ornalasqan kórshi memlekettermen kelissózder júrgizip, «Shardara» sý qoimasyna joǵarydan keminde 2,5 mlrd. tekshe metr sý túsýine yqpal jasaý jóninde tiisti ministrlikterge usynys berildi. Sizdiń tapsyrmańyzǵa sáikes, ministrliktermen birge tiisti jumystar atqarylady», – dedi aimaq basshysy.
Úkimet otyrysynan keiin jaýapty sala basshylarynyń mindetteri aiqyndalǵan jiyn ótti.
«Ortalyq atqarýshy organdar men óńir ákimderine kóktemgi egis jumystaryn baqylaýǵa alý tapsyryldy. Óńirimizdegi egin sharýashylyǵynyń jaiy Syrdariia ózenindegi sý deńgeiine tikelei bailanysty. Qazir sý resýrstarynyń tapshylyǵy jahandyq máselege ainaldy. Prezidentimiz sýdy neǵurlym tiimdi paidalaný, sý únemdeý tehnologiialaryn keńinen engizý men tsifrlandyrýǵa basa nazar aýdarýda.
Ártaraptandyrý – búgingi kúnniń basty talaby. Sondyqtan sý tapshylyǵy jaǵdaiynda kúrish kólemin ońtailandyryp, ózge daqyldar egisin ulǵaitý – mańyzdy qadam. Qala, aýdan ákimderi, qazirgi qalyptasqan sý tapshylyǵy jaǵdaiynda kúrishten basqa daqyldar kólemin arttyrýda naqty sharalar qabyldańyzdar», – dedi N. Nálibaev.
Basqosýda jergilikti turǵyndarǵa óz-ózin negizgi azyq-túlik, baqsha ónimderimen qamtamasyz etý úshin qosymsha egistik jer daiyndap berý jumystary da pysyqtaldy. Bul bastamany jurtshylyq qoldap, egistik jerge suranys artyp keledi. Biyl kartop, kókónis, baqsha daqyldaryn egýge 5 myńnan astam otbasy niet bildirgen. Olarǵa aýyldardan 3 300 gektar jer daiyndalyp, búginde 900 gektary egildi. Aimaq basshysy turǵyndardy jumyspen qamtýdy, olarǵa egin egýge, ónimderin satýǵa barynsha múmkindik jasaýdy tapsyrdy.
Májiliste sý aidyndarynda turǵyndardyń, ásirese balalardyń qaýipsizdigin saqtaýǵa qatysty tapsyrmalar berildi. Qala, aýdan ákimdikterine jaǵajailardy talapqa sáikestendirý júkteldi.
