Aqtóbede aimaqtyń eń iri sý qoimasynyń sýy tartylyp barady. Ańshylar men balyqshylar qoǵamynyń ókilderi bul jaǵdaiǵa qum óndiretin karerler sebep bolyp otyr dep esepteidi. Sonymen qatar, turǵyndardyń aitýynsha, Aqtóbe sý qoimasy kásiporyn qaldyqtarymen lastanyp jatyr, dep habarlaidy Dalanews.kz “31 arnaǵa” silteme jasap.
Ańshylar men balyqshylar qoǵamy bul máselege biliktiń nazaryn aýdartýǵa birneshe jyldan beri tyrysyp keledi. Qoǵamdyq birlestik tóraǵasynyń aitýynsha, sý qoimasynyń tartylýyna basty sebep — sý arnasynda qum qazý. Qazirgi tańda sý qoimasynyń úshten bir bóligine jýyǵyn karerler basyp qalǵan. Alaida oblystyq ekologiia departamenti zańbuzýshylyqty tekserý úshin naqty dáleldermen birge resmi ótinish qajet ekenin alǵa tartady.
"Siz jaǵany buza bastasańyz, bul apatqa aparady. Men bir kezde aittym: sý qorǵaý aimaǵy bar, sol jerdi qazýǵa bolmaidy dep. Biraq qazir sý tasityn arnanyń ózinde — balyq ýyldyryq shashatyn aýmaqta qazyp jatyr. Keiin sýdy ádeii aǵyzyp jiberedi de, qum óndirýge kirisedi", — deidi Aqtóbe oblystyq ańshylar men balyqshylar qoǵamynyń tóraǵasy Aleksei Gogel.
Qoǵam belsendileri sý qoimasynyń lastanyp jatqanyna da alańdaýly. Olar beinejazba túsirip, sý qoimasy mańynda úiilip jatqan qoqys taýlaryn kórsetken. Bul qaldyqtardyń qaidan shyqqany jáne ne sebepti dál sol jerde jinalǵany ázirge belgisiz.
Al jergilikti bilik ókilderi másele joq dep esepteidi. Olardyń aitýynsha, sý qoimasynda egin sýarýǵa da, óndiris oryndaryna da jetetin sý bar. Al jer qoinaýyn paidalanýshylar týraly akimattaǵylar úsh ken ornynda jumys istep jatqan eki kompaniianyń da zań aiasynda áreket etip jatqanyn málimdedi.
