Kezdesý barysynda aýdan ákimi Erlan Aıtahanov meımandarǵa qonaqjaılylyq tanytyp, sonaý bir jyldary álemdegi dańqty shaharlardyń biri bolǵan Otyrardyń kóne tarıhy men baı murasy jaıynda keńinen áńgimelep berdi. Sóz barysynda aýdan basshysy:
– Jastary jalyn júrekti, órshil namysty, bıik rýhty bolsa, ol eldiń eńsesi bıik bolady» dep dana halqymyz beker aıtpaǵan. Jasampaz eldiń jastaryna qaı ýaqytta da úlken senimmen qaraǵan Elbasymyz Nursultan Nazarbaev bıylǵy Qazaqstan halqyna arnaǵan Joldaýynda eldiń keleshegi bilimdi jastardyń qolynda ekenin aıtyp, kelesi jyldy «Jastar jyly» dep jarıalaýdy usyndy. Sondaı-aq, ulttyń kemel keleshegine, búgingi jas urpaqqa artylar eń úlken mindet – sananyń túzý jolmen qalyptasýy men bilimdilik, jan-jaqtylyq jasampaz eldiń jastaryna tán ekendigin taǵy da aıtqan Ult Kóshbasshysy álemdik bilim básekesiniń shyńyna el jastary da shyǵa alatynyna úlken úmit artty. Búgingi shara da Elbasymyzdyń salıqaly saıasatyn júzege asyrý baǵytynda ótip jatqan sharalardyń biri. Shyndyǵynda qazaq eliniń bilimdi jastary memleketimizdi qashan da qıaǵa jeteleri Haq. Barshańyzdy «Qazaq órkenıetiniń altyn dińgegi» sanalǵan kıeli Otyrar aýdanynyń tarıhymen tanysýǵa shaqyramyn, – dep, forýmǵa qatysatyn belsendi jastardyń aldaǵy saparlaryna sáttilik tiledi.
Munan soń qonaqtar Otyrar memlekettik arheologıalyq qoryq-mýzeıi men «Otyrar tóbege» baryp, topyraq astyna kómilgen ejelgi Otyrar qalasynyń tarıhynan syr shertetin qart jádigerlermen jáne baı muralarymyzben tanysty. Odan ári Babtardyń baby – Arystanbab babamyz jatqan kesenege baryp zıarat jasaǵan jastar túrki áleminiń rýhanı astanasy bolǵan Túrkistan qalasyna saparlaryn jalǵady.
Aıta keteıik, Joldaýda aıtylǵan mindetterdi júzege asyrý aıasynda oblys ortalyǵy Túrkistan qalasynda ótetin óńirlik jastar forýmynyń basty maqsaty jastardyń boıynda komýnıkatıvtilikti arttyrý, komandada jumys isteı bilý, synı oılaý, aratorlyq qasıetterin damytyp, jastarǵa Túrkistan óńiriniń tarıhyn tereńinen tanytý bolyp tabylady.
Dalanews.kz
