بۇگىن 17 قاراشا –حالىقارالىق ستۋدەنتتەر كۇنىنە وراي وتەتىن «تاۋەلسىزدىك – تىرەگىم، تۇركىستانىم – جۇرەگىم!» اتتى رەسپۋبليكالىق جاستار فورۋمىنا قاتىسۋشىلار وتىرار اۋدانىنا كەلىپ، شەجىرەلى وتىراردىڭ كونە تاريحىمەن تانىستى. اۋداننىڭ ءار سالاداعى بەلسەندى جاستارى الدىمەن اۋدان ورتالىعىنداعى «التىن شاڭىراق» مەيرامحاناسىندا تۇسكى اس ءىشىپ، وتىراردىڭ ءشولدى قاندىراتىن شۇباتى مەن ءدامى ءتىل ۇيىرەتىن باۋىرساعىنان ءدام تاتتى.

كەزدەسۋ بارىسىندا اۋدان اكىمى ەرلان ايتاحانوۆ مەيماندارعا قوناقجايلىلىق تانىتىپ، سوناۋ ءبىر جىلدارى الەمدەگى داڭقتى شاھارلاردىڭ ءبىرى بولعان وتىراردىڭ كونە تاريحى مەن باي مۇراسى جايىندا كەڭىنەن اڭگىمەلەپ بەردى. ءسوز بارىسىندا اۋدان باسشىسى:

– جاستارى جالىن جۇرەكتى، ءورشىل نامىستى، بيىك رۋحتى بولسا، ول ەلدىڭ ەڭسەسى بيىك بولادى» دەپ دانا حالقىمىز بەكەر ايتپاعان. جاسامپاز ەلدىڭ جاستارىنا قاي ۋاقىتتا دا ۇلكەن سەنىممەن قاراعان ەلباسىمىز نۇرسۇلتان نازاربايەۆ بيىلعى قازاقستان حالقىنا ارناعان جولداۋىندا ەلدىڭ كەلەشەگى ءبىلىمدى جاستاردىڭ قولىندا ەكەنىن ايتىپ، كەلەسى جىلدى «جاستار جىلى» دەپ جاريالاۋدى ۇسىندى. سونداي-اق، ۇلتتىڭ كەمەل كەلەشەگىنە، بۇگىنگى جاس ۇرپاققا ارتىلار ەڭ ۇلكەن مىندەت – سانانىڭ ءتۇزۋ جولمەن قالىپتاسۋى مەن بىلىمدىلىك، جان-جاقتىلىق جاسامپاز ەلدىڭ جاستارىنا ءتان ەكەندىگىن تاعى دا ايتقان ۇلت كوشباسشىسى الەمدىك ءبىلىم باسەكەسىنىڭ شىڭىنا ەل جاستارى دا شىعا الاتىنىنا ۇلكەن ءۇمىت ارتتى. بۇگىنگى شارا دا ەلباسىمىزدىڭ ساليقالى ساياساتىن جۇزەگە اسىرۋ باعىتىندا ءوتىپ جاتقان شارالاردىڭ ءبىرى. شىندىعىندا قازاق ەلىنىڭ ءبىلىمدى جاستارى مەملەكەتىمىزدى قاشان دا قياعا جەتەلەرى ھاق. بارشاڭىزدى «قازاق وركەنيەتىنىڭ التىن دىڭگەگى» سانالعان كيەلى وتىرار اۋدانىنىڭ تاريحىمەن تانىسۋعا شاقىرامىن، – دەپ، فورۋمعا قاتىساتىن بەلسەندى جاستاردىڭ الداعى ساپارلارىنا ساتتىلىك تىلەدى.

مۇنان سوڭ قوناقتار وتىرار مەملەكەتتىك ارحەولوگيالىق قورىق-مۋزەيى مەن «وتىرار توبەگە» بارىپ، توپىراق استىنا كومىلگەن ەجەلگى وتىرار قالاسىنىڭ تاريحىنان سىر شەرتەتىن قارت جادىگەرلەرمەن جانە باي مۇرالارىمىزبەن تانىستى. ودان ءارى بابتاردىڭ بابى – ارىستانباب بابامىز جاتقان كەسەنەگە بارىپ زيارات جاساعان جاستار تۇركى الەمىنىڭ رۋحاني استاناسى بولعان تۇركىستان قالاسىنا ساپارلارىن جالعادى.

ايتا كەتەيىك، جولداۋدا ايتىلعان مىندەتتەردى جۇزەگە اسىرۋ اياسىندا وبلىس ورتالىعى تۇركىستان قالاسىندا وتەتىن وڭىرلىك جاستار فورۋمىنىڭ باستى ماقساتى جاستاردىڭ بويىندا كوممۋنيكاتيۆتىلىكتى ارتتىرۋ، كوماندادا جۇمىس ىستەي ءبىلۋ، سىني ويلاۋ، اراتورلىق قاسيەتتەرىن دامىتىپ، جاستارعا تۇركىستان ءوڭىرىنىڭ تاريحىن تەرەڭىنەن تانىتۋ بولىپ تابىلادى.



Dalanews.kz