Májilis depýtaty Azat Perýashev Prezident Qasym-Jomart Toqaevtyń Qazaqstandy "Shtrafstan" dep ataityndarǵa qatysty aitqan pikirinen keiin óz oiyn bildirdi, dep habarlaidy dalanews.kz.
Depýtattyń aitýynsha, bul tirkes alǵash qoldanylǵan kezde-aq onyń orynsyz ekenin moiyndaǵan.
"Bul sóz durys emes ekenin aitqanmyn. Parlament ókili mádenietti sóileýi kerek, dóreki sóz qoldanbaýǵa tiis. Muny bir jyl buryn da aittym", – dedi ol.
Azat Perýashev Memleket basshysynyń synyn qalypty qabyldaitynyn jetkizdi. Onyń sózinshe, Prezidenttiń syny tek ózine emes, basqa azamattarǵa da qatysty aitylǵan. Sondyqtan mundai pikirlerden sabaq alyp, jumysty jalǵastyrý qajet. BAQ ókilderiniń Qazaqstandy "Shtrafstan" dep sanaisyz ba degen suraǵyna depýtat:
"Bizdiń el Shtrafstan emes. Biz órkenietti memleketpiz", – dep jaýap bergen.
Eske salaiyq, buǵan deiin Memleket basshysy Qazaqstandy "Shtrafstan" deitinderge jaýap berdi.
"Keibir elimizdi jaqtyrmaityn, mensinbeitin kisiler, ókinishke qarai, solardyń ishinde Parlament depýtattary bar, quqyqtyq áreketterimizdi "Shtrafstan", "Aiyppulstan" dep ataidy eken. Meili, óz oilarynyń kelteligin kórsete bersin. Al halqymyzǵa qoǵamdyq tártip pen qaýipsizdik kerek. Sondyqtan biz osy joldan taimaimyz, batyl túrde "Zań men tártip" saiasatyn júrgizemiz", - dedi Prezident.
