Petropavlda kóktemgi dala jumystaryn uıymdastyrýǵa arnalǵan dástúrli semınar-keńes ótti. Oǵan Aýyl sharýashylyǵy mınıstri Aıdarbek Saparov, SQO ákimi Ǵaýez Nurmuhambetov, aýdan ákimderi, ǵalymdar, sarapshylar men búkil oblystan dıqandar qatysty, dep habarlaıdy Dalanews.kz
Ýaqtyly jáne sapaly egis naýqanyn júrgizý – soltústik óńirdiń aýyl sharýashylyǵyn damytý kepili. Memleket sharýalarǵa jumystardy ońtaıly merzimde júrgizýge qajetti kómekti kórsetýde. Soltústik ÁKK jáne «KazAgroQarjy» arqyly 60 mıllıard teńge kóleminde erte qarjylandyrýdyń arqasynda dıqandar maýsymǵa daıyndyq jumystaryn tyńǵylyqty júrgizip, tuqym, tyńaıtqyshtar men janar-jaǵarmaı satyp alyp, tehnıkalaryn jóndedi.
Bıyl bıdaı egis alańy 2,5 mıllıon gektardy quraıdy. Sonymen qatar, maıly daqyldardyń alqaby 85 myń gektarǵa ósip, 760 myń ga jetpek. Sharýalar 333 myń tonna mıneraldy tyńaıtqyshtar engizbek, bul 2024 jylmen salystyrǵanda 30%-ǵa kóp. 470 myń tonna tuqym daıyndalyp, egiske 4 myń joǵary ónimdi tehnıka men 1,5 myń zamanaýı sebý kesheni shyqpaq. Sonymen qatar, sharýalar 87 mıllıard teńgege 3 myń jańa tehnıka satyp alady. 52 myń tonna jeńildetilgen dızel otyny bólindi.
Keńeste qatysýshylar mamandardyń usynystarymen tanysyp, zamanaýı agrotehnologıalar men kóktemgi egis júrgizýdiń ozyq ádisterin qarastyrdy. Dıqandarǵa joǵary ónimdilik pen resýrstardy tıimdi paıdalaný úshin osy mańyzdy aspektilerdi eskerý usynyldy.
"Egis naýqanyn ýaqytyly jáne sapaly túrde ótkizip, sapaly tuqymdardy, agrotehnologıalardy jáne zamanaýı tehnıkany paıdalaný kerek. Sondaı-aq, egis alańdaryn ártaraptandyrýǵa erekshe nazar aýdarý, maıly jáne kókónis daqyldaryn egýge kóńil bólý qajet. Sonymen qatar, jem-shóp egisin kóbeıtip, sý únemdeıtin tehnologıalardy engizý qajet", - dep jazdy óńir basshysy áleýmettik jelide.
