Sý tasqyny bastalǵaly Soltústik Qazaqstan oblysynda turǵyn úilerdi sý basýǵa jol berilgen joq. Bul týraly Úkimet otyrysynda oblys ákimi Ǵaýez Nurmuhambetov málimdedi, dep habarlaidy Dalanews.kz
Ol Respýblikalyq jáne jergilikti mańyzy bar avtojoldarda 27 jerden sý tasyp ótý jaǵdaiy tirkelgenin, olar 4-5 kún ishinde toqtatylǵanyn atap ótti. Qazirgi tańda 2 ýchaskede sý tasýy áli de jalǵasýda.
Óńirde 8 qorǵanys bógetin qalpyna keltirý jáne nyǵaitý, Petropavl sý toraby mańyndaǵy ainalma kanaldy salý jáne Sokolovka mańyndaǵy Esil ózeniniń arnasyn túzetý jumystary aiaqtaldy. Sharýashylyq esebinen Novonikolskoe aýylynda sý basý qaýpin azaitý maqsatynda ainalma kanal salyndy. Atalǵan kanaldardyń jumysy tiimdiligin kórsetti.
Eldi mekenderden 1,5 mln tekshe metr qar shyǵaryldy, 400 myń tekshe metr erigen sý soryldy, 200 myń qap qum tóseldi, sondai-aq jarý jumystary júrgizildi. Bul turǵyn úiler men infraqurylym nysandaryn sý basýdan saqtap qalýǵa septigin tigizdi. Sý tasqyny jaǵdaiy 8 dron arqyly baqylanýda, bul drondar keiin órt qaýpi kezeńinde qoldanylmaq.
«Ózender men kólderdiń deńgeii táýlik boiy baqylaýda. Qazirgi jaǵdai boiynsha Petropavlda sý tasqynynyń birinshi jáne ekinshi tolqyndarynyń sharyqtaý kezeńi ótip jatyr. Sý deńgeii turǵyn úiler men infraqurylym úshin qaýipti mejege jetken joq. Úshinshi tolqynnyń sharyqtaý kezeńi sáýir aiynyń sońynda Jabai jáne Kalýton ózenderiniń Aqmola oblysyndaǵy tasý esebinen oblys ortalyǵyna jetedi dep kútilýde. Bul eldi mekenderge qaýip tóndirmeidi. Sý tasqyny jaǵdaiy turaqty baqylaýda»,- dep atap ótti Ǵaýez Nurmuhambetov.
