Soltústik Qazaqstan oblysynda sý tasqynynyń úshinshi tolqyny ótip jatyr,– dep habarlaidy Dalanews.kz
Qyzyljar aýdanynyń Teplichnoe aýylynda qorǵanys bógetin nyǵaitý jumystary úshinshi kún boiy toqtaýsyz júrgizilýde. Jumystar táýlik boiy atqarylyp jatyr. Bul iske 1600 adam men júzden asa tehnika jumyldyrylǵan. Aimaqtaǵy jaǵdai oblys ákimi Ǵaýez Nurmuhambetov jeke baqylaýynda.
Nysanda áskeriler, qutqarýshylar, kásiporyndar men uiymdardyń qyzmetkerleri, memlekettik qyzmetshiler, eriktiler aianbai eńbek etýde. Sonymen qatar, kómekke Aqmola, Qostanai oblystary men Astanadan qutqarýshylar kelgen.
Teplichnoe aýylynda 700 adam turady. Ýaqytyly evakýatsiia júrgizildi, Beskól men Petropavlda evakýatsiialyq beketter ashyldy.
Óńirdegi sý tasqyny jaǵdaiy táýlik boiy baqylaýda. Sý tasqynynyń sharyqtaý shegi 28-30 sáýir kúnderi kútilýde.
"Úsh kúnnen beri táýlik boiy jumys istep jatyrmyz. Teplichnyidaǵy qorǵanys bógetin nyǵaitý barysy jeke baqylaýymda. Keshe 30 myń qadam júrip óttim, búgin de osynsha qashyqtyqty eńserdim. Basty mindet — eldi mekenniń tolyq qaýipsizdigin qamtamasyz etý. Barlyq qaýip joiylǵanǵa deiin jumysty jalǵastyra beremiz", - dep jazdy óńir basshysy Ǵaýez Nurmuhambetov áleýmettik jelide.
