Premer-Ministr Oljas Bektenov Petropavlda Esil ózeni arnasynan asyp ketken jaǵdaida qalany jáne jaqyn mańdaǵy eldi mekenderdi sý tasqynynan qorǵaýǵa arnalǵan bógetterdi nyǵaitý jumystaryn tekserdi, – dep habarlaidy Dalanews.kz.
Úkimet basshysy Teplichnoe jáne Kojevennaia aýyldaryndaǵy qorǵanysh úiindileriniń jaǵdaiyn qarap, 2017 jylǵy sý tasqynynan keiin júrgizilgen jumystardyń esebin tyńdady.
Qazirgi ýaqytta Sergeev sý qoimasyndaǵy sý deńgeiiniń joǵarylaýyn eskere otyryp, qoldanystaǵy bógetterdi nyǵaitý jáne olardyń uzyndyǵy men biiktigin arttyrý boiynsha jumystar júrgizilýde.
Jalpy, qarǵyn sýdy ótkizý úshin avtojoldarda jol tósemin arshý jumystary 6 ret júrgizildi. Balamaly baǵyt qarastyrylyp, belgiler qoiylyp, kezekshilik uiymdastyrylǵan. Sý tasqyny kezeńi bastalǵaly beri eldi mekenderdiń kósheleri men aýla aýmaqtarynan 440 myń m3 sý soryldy. 165 shaqyrymnan astam aryq tazartyldy, 2.7 shaqyrym kanaldar keńeitilip, tereńdetildi.
Oljas Bektenov sý tasqynynan zardap shekkenderdi qoldaý sharalary men júrgizilip jatqan jumystar týraly turǵyndar suraqtaryna jaýap berdi, eriktiler men sarapshylarǵa kórsetken kómekteri men qoldaýlary úshin alǵysyn bildirdi.
Úkimet basshysy tartylǵan qosymsha kúshter men tehnikany eskere otyryp, bógetterdi nyǵaitý jumystarynyń qarqynyn jedeldetý, onyń ishinde biiktigin arttyrý qajettigin atap ótti.
– Jumysqa jeke quram men Ulttyq ulan jumyldyryldy. Polk te kúsheitiledi. Qorǵanys ministrligi qosyldy, sondyqtan kúsh jetkilikti bolýy kerek. Qazir kúsh biriktirýimiz qajet. Aldaǵy 2-3 kúnde aýyr zardaptardyń aldyn alý úshin kóp jumys isteý kerek. Eń aldymen adamdar zardap shekpeýi mańyzdy, – dep atap ótti Oljas Bektenov.
Qazirgi tańda sý tasqynyna qarsy is-sharalarǵa ákimdiktiń, PD, Ulttyq ulan bólimshesiniń jáne jeke uiymdardyń 1432 qyzmetkeri, 1200 erikti qatysýda. Premer-Ministrdiń tapsyrmasy boiynsha búgin Qorǵanys ministrliginiń 300 áskeri qyzmetshisi keldi. Osylaisha barlyǵy 3000-ǵa jýyq adam jumyldyryldy.
Soltústik Qazaqstan oblysyndaǵy sý tasqyny jaǵdaiy erekshe baqylaýda. Premer-Ministrdiń birinshi orynbasary Roman Skliar da osynda. Jedel shtabtar táýlik boiy jumys isteidi.
