Premer ministr Oljas Bektenov «Samuryq Qazyna» AQ direktorlar keńesiniń otyrysyn ótkizip, iri jobalardyń júzege asýyn qarady, dep habarlaidy Dala News.
Jiynda Memleket basshysynyń tapsyrmalary aiasynda ekonomikany qoldaý jáne infraqurylymdyq jobalardy iske asyrý barysy talqylandy. Qordyń 2026 jyldyń birinshi toqsanyndaǵy nátijeleri qaralyp, kiris 8 paiyzǵa, al taza paida 93 paiyzǵa artqany aityldy. Negizgi óndiristik kórsetkishter josparǵa sai oryndalǵan.
Qor basshysy Nurlan Jaqypov Qytai naryǵynda 3 mlrd iýan kólemindegi panda obligatsiialar sátti ornalastyrylǵanyn habarlady. Obligatsiialar úsh jylǵa shyǵarylǵan, kiristiligi jyldyq 2,18 paiyzdy qurady. Bul qaryz tartýdyń rekordtyq tómen deńgeii retinde baǵalanyp otyr. Tartylǵan qarajat kólik logistika, infraqurylym jáne basqa da salalardaǵy jobalarǵa baǵyttalady.
Eseptik kezeńde birqatar halyqaralyq kelisimderge qol qoiyldy. Olardyń qatarynda «Taý Ken Samuryq» pen Rýandanyń Ngali Holdings kompaniiasy arasyndaǵy kelisim, sondai aq «Samuryq Qazyna Invest» pen Ázerbaijannyń AZCON kompaniiasy arasyndaǵy porttardy tereńdetý jobasy bar.
Jiynda jalpy quny 38,6 trln teńgeni quraityn 64 iri investitsiialyq jobaǵa erekshe nazar aýdaryldy. Onyń ishinde munai gaz, munai himiiasy, energetika, kólik logistika jáne taý ken salalary bar. Qazirgi tańda 41 joba boiynsha kelisimshart jasalǵan, 33 jobada qurylys jumystary bastalǵan.
Atap aitqanda, Jambyl jáne Pavlodar oblystarynda qýaty 1 GVt bolatyn eki jel elektr stantsiiasynyń qurylysy bastaldy. Bul jobalar jasyl energetikany damytýǵa baǵyttalǵan. Sonymen qatar «Býtadien» munai himiiasy jobasy boiynsha Qytaidyń Sinopec Guangzhou Engineering kompaniiasymen kelisim jasalyp, jumystardy mamyr aiynda bastaý josparlanǵan.
Budan bólek «Beineý Bozoi Shymkent» gaz magistraliniń ekinshi jelisin salý jáne Atyraý oblysyndaǵy arnaiy ekonomikalyq aimaqty damytý máseleleri qaraldy. Geologiialyq barlaý salasynda jasandy intellektti engizý jobasy da talqylandy.
Jiyn qorytyndysy boiynsha Premer ministr Qor basshylyǵyna barlyq jobalar boiynsha baqylaýdy kúsheitýdi jáne jergilikti qamtý úlesin arttyrýdy tapsyrdy.
