Petropavlda maily daqyldardy óńdeitin «Maslo-Del» seriktestiginiń maidy ekstraktsiialaý zaýyty iske qosyldy. Jańa kásiporynǵa SQO ákimi Ǵaýez Nurmuhambetov baryp, tehnologiialyq protsespen tanysty,- dep habarlaidy Dalanews.kz
Soltústik Qazaqstan oblysynda iri investitsiialyq joba sátti júzege asty, bul Prezidenttiń agrarlyq saladaǵy óńdelgen ónimniń úlesin 70%-ǵa deiin ulǵaitý jónindegi tapsyrmasyna sáikes oryndaldy.
Jobaǵa 34 mlrd teńge investitsiia quiylyp, tolyq qýatyna shyqqanda 220 jumys orny ashylady. Biýdjetke 3,2 mlrd.tg salyq quiady.
Jańa kásiporyn jylyna 400 myń tonnaǵa deiin maily daqyldardy óńdei alady. Óndiris tolyqtai avtomattandyrylǵan jáne qaldyqsyz jumys isteidi, zamanaýi eýropalyq jabdyqtarmen qamtylǵan. Zaýyttyń ónimi - kúnbaǵys, rap jáne zyǵyr maiy, sondai-aq kúnjara men shrot.
Ashylǵan kúnnen bastap 10 myń tonna tazartylmaǵan kúnbaǵys maiy óndirildi. Kóktemde ekstraktsiia jelisi iske qosylsa, jyl sońyna deiin tamaq ónerkásibinde suranysqa ie letsitin óńdeý tsehy ashylady.
"Kásiporyn shikizatty jergilikti diqandardan satyp alady, bul óńirdiń joǵary áleýetin kórsetedi. Biyl ártaraptandyrý aiasynda maily daqyldardyń egis alqaby 85 myń gektarǵa ulǵaitylyp, 760 myń gektarǵa deiin jetti", - dep atap ótti óńir basshysy.
Jańa zaýyttyń arqasynda óńir barlyq ónimdi óńdeýge múmkindik aldy.
Aita keteiik, byltyr SQO-da 780 myń tonna maily daqyl jinalsa, búginde óńdeý kásiporyndarynyń jalpy qýaty jylyna 811 myń tonnany quraidy.
