Soltústik Qazaqstan oblysynyń Taıynsha kópsalaly aýdanaralyq aýrýhanasyn kúrdeli jóndeýdi aıaqtaýǵa Arnaýly memlekettik qordan 1,3 mlrd teńge bólindi, dep habarlaıdy Dalanews.kz 

Qazirgi ýaqytta tehnıkalyq bazany jáne ınjenerlik jelilerdi jańǵyrtý jumystary júrgizilýde. Onyń aıasynda zertteýlerdi tikeleı aýdan ortalyǵynda júrgizý úshin MRT apparatyna jáne zamanaýı klınıkalyq-dıagnostıkalyq zerthanaǵa arnalǵan mamandandyrylǵan úı-jaılar ashý qarastyrylyp otyr.

Sonymen qatar halyqaralyq trıaj júıesi boıynsha qabyldaý bólmesin uıymdastyrylmaq. Jobaǵa sáıkes onda personaldyń jedel monıtorıń júrgizý úshin kedergisiz kirý múmkindigi bar reanımasıalyq tósekter ornalastyrylatyn bolady. Bul medısınalyq aralasýdyń jedeldigin jáne medısınalyq qyzmetterdiń joǵary sapasyn qamtamasyz etedi.

Jalpy alǵanda, jobany júzege asyrý nátıjesinde medısınalyq mekeme shuǵyl jáne josparly kómek kórsetýdiń zamanaýı standarttaryna sáıkes keltirilmek. 

QR Qarjy mınıstrliginiń derekterine sáıkes, Arnaýly memlekettik qordan 400-den astam áleýmettik jáne komýnaldyq nysandarǵa, onyń ishinde 183 medısınalyq mekemege qatysty jobalardy júzege asyrýǵa 482 mlrd teńge bólingen. Birqatar jobalar «Aýyldyq densaýlyq saqtaý salasyn jańǵyrtý» baǵdarlamasy aıasynda qamtylǵan. Máselen, alǵashqy medısınalyq-sanıtarlyq kómek nysandaryn, kópsalaly aýrýhanalardy, mamandandyrylǵan medısınalyq ortalyqtardy, shuǵyl medısınalyq kómek ınfraqurylymdaryn salý jáne jańartý jumystary júrgizilýde.