سولتۇستىك قازاقستان وبلىسىنىڭ تايىنشا كوپسالالى اۋدانارالىق اۋرۋحاناسىن كۇردەلى جوندەۋدى اياقتاۋعا ارناۋلى مەملەكەتتىك قوردان 1،3 ملرد تەڭگە ءبولىندى، دەپ حابارلايدى Dalanews.kz
قازىرگى ۋاقىتتا تەحنيكالىق بازانى جانە ينجەنەرلىك جەلىلەردى جاڭعىرتۋ جۇمىستارى جۇرگىزىلۋدە. ونىڭ اياسىندا زەرتتەۋلەردى تىكەلەي اۋدان ورتالىعىندا جۇرگىزۋ ءۇشىن مرت اپپاراتىنا جانە زاماناۋي كلينيكالىق-دياگنوستيكالىق زەرتحاناعا ارنالعان مامانداندىرىلعان ءۇي-جايلار اشۋ قاراستىرىلىپ وتىر.
سونىمەن قاتار حالىقارالىق ترياج جۇيەسى بويىنشا قابىلداۋ بولمەسىن ۇيىمداستىرىلماق. جوباعا سايكەس وندا پەرسونالدىڭ جەدەل مونيتورينگ جۇرگىزۋ ءۇشىن كەدەرگىسىز كىرۋ مۇمكىندىگى بار رەانيماسيالىق توسەكتەر ورنالاستىرىلاتىن بولادى. بۇل مەديسينالىق ارالاسۋدىڭ جەدەلدىگىن جانە مەديسينالىق قىزمەتتەردىڭ جوعارى ساپاسىن قامتاماسىز ەتەدى.
جالپى العاندا، جوبانى جۇزەگە اسىرۋ ناتيجەسىندە مەديسينالىق مەكەمە شۇعىل جانە جوسپارلى كومەك كورسەتۋدىڭ زاماناۋي ستاندارتتارىنا سايكەس كەلتىرىلمەك.
ق ر قارجى مينيسترلىگىنىڭ دەرەكتەرىنە سايكەس، ارناۋلى مەملەكەتتىك قوردان 400-دەن استام الەۋمەتتىك جانە كوممۋنالدىق نىساندارعا، ونىڭ ىشىندە 183 مەديسينالىق مەكەمەگە قاتىستى جوبالاردى جۇزەگە اسىرۋعا 482 ملرد تەڭگە بولىنگەن. ءبىرقاتار جوبالار «اۋىلدىق دەنساۋلىق ساقتاۋ سالاسىن جاڭعىرتۋ» باعدارلاماسى اياسىندا قامتىلعان. ماسەلەن، العاشقى مەديسينالىق-سانيتارلىق كومەك نىساندارىن، كوپسالالى اۋرۋحانالاردى، مامانداندىرىلعان مەديسينالىق ورتالىقتاردى، شۇعىل مەديسينالىق كومەك ينفراقۇرىلىمدارىن سالۋ جانە جاڭارتۋ جۇمىستارى جۇرگىزىلۋدە.
