Abai kúniniń negizgi sharalarynyń biri Óskemendegi Respýblika alańyndaǵy hakim eskertkishiniń aldynda ótti. Aqynnyń týǵan kúnine orai ziialy qaýym ókilderi, jergilikti atqarýshy organdardyń qyzmetkerleri, óner maitalmandary, aqyndar men jazýshylar jinaldy, dep habarlaidy dalanews.kz.
Abai óz dáýiriniń shyndyǵyn aityp qana qoiǵan joq. Ol eldiń erteńin oilap, urpaqtyń qandai bolýy kerektigin de aiqyndap berdi. Sharada oblys ákimi Nurymbet Saqtaǵanov Abai murasynyń ýaqyt ótken saiyn mańyzy arta túsetinin atap ótti.
– Zamanalar aýysyp, dúnie didary kúnde ózgerse de, halqymyzdyń Abaiǵa degen qurmet sezimi esh kemimeidi, – dedi aimaq basshysy.
Nurymbet Saqtaǵanov óz sózinde Memleket basshysy Qasym-Jomart Toqaevtyń Abaidy dáripteý arqyly ulttyq sanany nyǵaitýǵa, el birligin bekemdep, qoǵamnyń rýhani kemeldigin arttyrýǵa erekshe mán berip otyrǵanyn atap ótti.
Shyn máninde, Abai murasy – ótkenniń ǵana enshisi emes. Onyń «bes dushpannan» boidy aýlaq salyp, «bes asyl iske» umtylýǵa shaqyrǵan oilary búgin de ózektiligin joǵaltqan joq. Oblys ákimi búgingi urpaqtyń Abai murasynyń túp-tamyrynan nár alyp, rýhani álemin baiyta túsýi mańyzdy ekenin aitty.
– Týǵan elin Abaisha súiip, Abaisha kúise, paidanyń emes, ardyń júgin kóterse, ystyq qairat, nurly aqyl, jyly júrekke boi aldyrsa, baǵyndyrar shyńy biik bolady, – dedi Nurymbet Saqtaǵanov.
Abaidyń ózi «Adamzattyń bárin súi, baýyrym dep» dep adam balasyn tatýlyq pen izgilikke úndedi. Onyń shyǵarmalaryndaǵy oidyń salmaǵy da osynda – jeke adamnyń kemeldigin eldiń kemeldigimen sabaqtastyra bilýinde.
– Abaidy búkil álemde ulyqtap jatsa da, jetkiliksiz dep oilaimyn. Óitkeni ómirimiz ben tirshiligimizdi Abai óleńderi, shyǵarmalarynyń mazmunyna sáikes tárbieleýimiz kerek. Hakimniń óleńderi alǵash poliak tiline aýdaryldy. «Nege birinshi sol tilge aýdaryldy?» dep ózime suraq qoidym. Olardan «urpaǵymyzdy Abai shyǵarmashylyǵymen tárbielesek» degen jaýap aldym. Bizge de sondai betburys kerek. Abai qazaqsyz, qazaq Abaisyz bolmaidy. Taǵdyrymyz hakim únine jáne «Tolyq adam» ideiasyna bailanǵan, – deidi S.Amanjolov atyndaǵy ShQÝ professory Slámbek Orazalin.
Hakim armandaǵan bilimdi, eńbekqor, birligi bekem qoǵamdy qalyptastyrý – búgingi urpaqtyń da ortaq mindeti. Al Abai sózi sol jolda baǵyt-baǵdar beretin rýhani temirqazyq bolyp qala beredi.
