SQO-da 8 myń basqa arnalǵan megaferma ashylady. Iske qosylǵannan keiin bul elimiz ben Ortalyq Aziiadaǵy eń iri sút keshenine ainalady, – dep habarlaidy Dalanews.kz
Jobany «Zenchenko i K» KS júzege asyryp, oǵan 9 milliard teńge investitsiia quiýda.
Munda jyl saiyn 26 myń tonna sút óndirilmek. Óńirde sútti mal sharýashylyǵy qarqyndy damyp keledi: biyl 11 jańa ferma salynbaq, al ótken jyly 17 sút kesheni iske qosyldy. Qyzyl aýdanyna jumys babymen barǵan oblys ákimi Ǵaýez Nurmuhambetov keshenniń qurylysymen tanysty.
Sondai-aq, «Zenchenko i K» alqaby men Novonikolskoe aýylynda Gennadii Zenchenkonyń qoldaýymen salynǵan kópfýnktsionaldy balalardyń oiyn jáne sport alańyn qarady. Oǵan qosa, óńir basshysy «Servis Jars» JShS-niń zamanaýi jańbyrlatyp sýarý júiesimen jabdyqtalǵan jońyshqa alqabyndaǵy shóp shabý jumystaryn baqylady. Sharýashylyq jońyshqa óńdeitin zaýyt salýdy kózdep otyr. Sonymen qatar, aýdan diqandarymen kezdesip, kóktemgi egis jumystaryn aiaqtaý máseleleri talqylandy.
Taǵy bir mańyzdy joba – óńir úshin kólik qatynasynyń mańyzdy dálizi bolyp sanalatyn «Jezqazǵan–Petropavl» respýblikalyq avtojolynyń ortasha jóndeýi. Jumystar joldyń ártúrli ýchaskelerinde birneshe merdiger uiymdardyń qatysýymen qatar júrgizilýde. Eki jylda 135 km jol asfalttaldy, biylǵa jospar – 215 km. Jyl sońyna deiin Pokrovka– Beskól aýyldary jáne Sergeevkadan Aqmola oblysynyń shekarasyna deiingi aralyqta asfalt tóseý aiaqtalady.
"Bul turǵyndarǵa yńǵaily ári qaýipsiz qozǵalysty qamtamasyz etetin úlken infraqurylymdyq jobanyń sońǵy kezeńi bolmaq", - dep atap ótti oblys ákimi.
