Tanymal boksshy Baqtiiar Artaev jańa qyzmetke taǵaiyndaldy, dep habarlaidy Dalanews.kz.
Sportshy Qyzylorda oblysynyń dene shynyqtyrý, sport jáne týrizm basqarmasynyń basshysy boldy. Jańa basshyny aktiv otyrysynda oblys ákimi Nurlybek Nálibaev tanystyrdy.
«Baqtiiar Ǵarifollauly – barlyǵyńyzǵa jaqsy tanys, óz isiniń bilikti mamany, myqty menedjer. Sport salasynyń jandanýyna orasan zor úles qosqan azamat. Baqtiiar Ǵarifollaulynyń osy kezge deiin alǵan bilimi men jinaqtaǵan mol tájiribesin eskerip, Syr óńirindegi sport jáne týrizm salasyn burynǵydan da qarqyndy damytady dep senim bildiremiz", - dedi Nurlybek Nálibaev.
Baqtiiar Artaev 1983 jyly Taraz qalasynda dúniege kelgen. Muhammed Haidar Dýlati atyndaǵy Taraz memlekettik ýniversitetin «Quqyqtaný», «Menedjment», Qazaq sport jáne týrizm akademiiasyn «Dene shynyqtyrý jáne sport», QazTutynýodaǵy Qaraǵandy ekonomikalyq ýniversitetin «Memlekettik jáne jergilikti basqarý» mamandyqtary boiynsha bitirgen. «Quqyqtaný», «Dene shynyqtyrý jáne sport» magistri.
Ol – 2004 jyly Afinyda ótken Olimpiada oiyndarynda el qorjynyna altyn salǵan sportshy, Vel Barker Kýbogynyń iegeri, halyqaralyq sport sheberi, Qazaqstannyń eńbek sińirgen sport sheberi, bokstan Qazaqstan Respýblikasynyń 7 dúrkin chempiony.
