تانىمال بوكسشى باقتيار ارتايەۆ جاڭا قىزمەتكە تاعايىندالدى، دەپ حابارلايدى Dalanews.kz.
سپورتشى قىزىلوردا وبلىسىنىڭ دەنە شىنىقتىرۋ، سپورت جانە تۋريزم باسقارماسىنىڭ باسشىسى بولدى. جاڭا باسشىنى اكتيۆ وتىرىسىندا وبلىس اكىمى نۇرلىبەك نالىبايەۆ تانىستىردى.
«باقتيار عاريفوللا ۇلى – بارلىعىڭىزعا جاقسى تانىس، ءوز ءىسىنىڭ بىلىكتى مامانى، مىقتى مەنەدجەر. سپورت سالاسىنىڭ جاندانۋىنا وراسان زور ۇلەس قوسقان ازامات. باقتيار عاريفوللا ۇلىنىڭ وسى كەزگە دەيىن العان ءبىلىمى مەن جيناقتاعان مول تاجىريبەسىن ەسكەرىپ، سىر وڭىرىندەگى سپورت جانە تۋريزم سالاسىن بۇرىنعىدان دا قارقىندى دامىتادى دەپ سەنىم بىلدىرەمىز"، - دەدى نۇرلىبەك نالىبايەۆ.
باقتيار ارتايەۆ 1983 جىلى تاراز قالاسىندا دۇنيەگە كەلگەن. مۇحاممەد حايدار دۋلاتي اتىنداعى تاراز مەملەكەتتىك ۋنيۆەرسيتەتىن «قۇقىقتانۋ»، «مەنەدجمەنت»، قازاق سپورت جانە تۋريزم اكادەمياسىن «دەنە شىنىقتىرۋ جانە سپورت»، قازتۇتىنۋوداعى قاراعاندى ەكونوميكالىق ۋنيۆەرسيتەتىن «مەملەكەتتىك جانە جەرگىلىكتى باسقارۋ» ماماندىقتارى بويىنشا بىتىرگەن. «قۇقىقتانۋ»، «دەنە شىنىقتىرۋ جانە سپورت» ماگيسترى.
ول – 2004 جىلى افينىدا وتكەن وليمپيادا ويىندارىندا ەل قورجىنىنا التىن سالعان سپورتشى، ۆەل باركەر كۋبوگىنىڭ يەگەرى، حالىقارالىق سپورت شەبەرى، قازاقستاننىڭ ەڭبەك سىڭىرگەن سپورت شەبەرى، بوكستان قازاقستان رەسپۋبليكاسىنىڭ 7 دۇركىن چەمپيونى.
