Танымал боксшы Бақтияр Артаев жаңа қызметке тағайындалды, деп хабарлайды Dalanews.kz.
Спортшы Қызылорда облысының дене шынықтыру, спорт және туризм басқармасының басшысы болды. Жаңа басшыны актив отырысында облыс әкімі Нұрлыбек Нәлібаев таныстырды.
«Бақтияр Ғарифоллаұлы – барлығыңызға жақсы таныс, өз ісінің білікті маманы, мықты менеджер. Спорт саласының жандануына орасан зор үлес қосқан азамат. Бақтияр Ғарифоллаұлының осы кезге дейін алған білімі мен жинақтаған мол тәжірибесін ескеріп, Сыр өңіріндегі спорт және туризм саласын бұрынғыдан да қарқынды дамытады деп сенім білдіреміз", - деді Нұрлыбек Нәлібаев.
Бақтияр Артаев 1983 жылы Тараз қаласында дүниеге келген. Мұхаммед Хайдар Дулати атындағы Тараз мемлекеттік университетін «Құқықтану», «Менеджмент», Қазақ спорт және туризм академиясын «Дене шынықтыру және спорт», ҚазТұтынуодағы Қарағанды экономикалық университетін «Мемлекеттік және жергілікті басқару» мамандықтары бойынша бітірген. «Құқықтану», «Дене шынықтыру және спорт» магистрі.
Ол – 2004 жылы Афиныда өткен Олимпиада ойындарында ел қоржынына алтын салған спортшы, Вэл Баркер Кубогының иегері, халықаралық спорт шебері, Қазақстанның еңбек сіңірген спорт шебері, бокстан Қазақстан Республикасының 7 дүркін чемпионы.
