Shymkent qalasy ákiminiń orynbasary Rýslan Berdenov otadan keiin alǵash ret el aldyna shyqty, dep habarlaidy Dalanews.kz.
"Meniń basyma túsken aýyr jaǵdaidan kópshiligińiz habardarsyzdar dep bilemin. Bul oqys oqiǵa maǵan da, meniń otbasym men jaqyndaryma da aýyr tigeni anyq. Muny sózben aityp jetkizý óte qiyn.
Alaida, synaqqa toly bolǵan osy ýaqyt aralyǵynda kóptegen adamdardyń, áriptesterimniń, tamyr-tanystarymnyń janashyrlyǵyn, qoldaýyn, tilektestigin sezindim. Telefonyma túsken qońyraýlar, habarlamalar, áleýmettik jelidegi tileýles jazbalar kóńilime demeý bolǵanyn, kúsh-qýat bergenin, sergitkenin aitqym keledi", deidi Berdenov.
Sheneýnik 3 aptadan asa ýaqyt aýrýhanada jatqan.
"Ózim de aiaqtan turyp, kúndelikti tirshiligime oralatyn sát taiap qaldy. Álbette, birinshi Allanyń, sodan soń dárigerlerimizdiń jiti baqylaýynyń, em-domynyń arqasynda densaýlyǵym ońaldy, qalpyna keldi. Osy ýaqyt ishinde men elimizdiń meditsinasy kóp ilgerilegenine, sheteldik klinikalardan esh kem emestigine kóz jetkizdim. Aq halatty abzal jandarymyzdyń meiirimi men kásibiligi de rizashylyǵymyzǵa ábden laiyq. Barshańyzdyń qoldaýlaryńyz ben janashyrlyqtaryńyzǵa sheksiz alǵysymdy aitamyn", deidi Rýslan Berdenov.
Eske sala keteiik, 21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Politsiia málimetinshe, kúdikti ustalyp, ýaqytsha ustaý izoliatoryna qamalǵan, bul derek boiynsha qylmystyq is qozǵalǵan.
