Almatyda qoǵamdyq kólikterge qatysty turǵyndardyń shaǵymy azaiar emes. Sońǵy ýaqytta avtobýstarǵa adamdardyń syimai jatqan videolaryn jii kezdestirsek, endi áleýmettik jelide avtobýs tasymaldaýshylarynyń ákimdikke joldaǵan haty jariialandy. Onda sýbsidiia boiynsha 15 mlrd teńgeden astam bereshek jinalǵany jáne 2 qarashadan bastap avtobýstar sanyn 30 paiyzǵa qysqartý máselesi kóterilgeni aitylǵan. Osy aqparatqa qatysty Almaty ákimdiginen resmi túsinikteme aldyq, dep habarlaidy dalanews.kz.
Almatyda qoǵamdyq kólik máselesi sońǵy ýaqytta turǵyndar arasynda jii talqylanyp júr. Ásirese, tańerteń jáne keshki qarbalas ýaqytta avtobýstardyń shamadan tys tolýy jolaýshylardyń narazylyǵyn týǵyzǵan.
Budan bólek, qarbalas ýaqytta metronyń jekelegen stantsiialarynda da jolaýshylar legi artyp, týrniketter aldynda kezek paida bolatyny jii aitylyp júr.
Áleýmettik jelide 15 mlrd teńge bereshek týraly aqparat tarady
Qoǵamdyq kólikke qatysty shaǵymdar jalǵasyp jatqan tusta Threads áleýmettik jelisinde avtobýs tasymaldaýshylarynyń qala ákimine joldaǵan haty jariialandy.
Jazba avtory qujatqa silteme jasai otyryp, ákimdiktiń tasymaldaýshylar aldyndaǵy sýbsidiia boiynsha bereshegi 15 mlrd teńgeden asqanyn málimdedi. Sondai-aq jariialanymda qarjylandyrýdyń keshigýi avtoparkterdiń janarmai men qosalqy bólshekter satyp alýyna qiyndyq týǵyzyp otyrǵany jazylǵan.
Avtordyń sózinshe, hatta 2026 jylǵy 2 qarashadan bastap avtobýstardyń jelige shyǵýyn 30 paiyzǵa qysqartý máselesi kóterilgen.
Alaida bul aqparatty ázirge Almaty ákimdigi resmi túrde rastaǵan joq.
Ákimdik ne deidi?
Osy máselege qatysty Almaty qalasynyń Jol qozǵalysyn uiymdastyrý jáne jolaýshylar kóligi basqarmasynan resmi túsinikteme suradyq.
Basqarmanyń habarlaýynsha, ákimdik tasymaldaýshylarǵa sýbsidiialardyń qalǵan somasyn tóleýden bas tartpaidy. Alaida bul másele qalalyq biýdjetti kezekti naqtylaý barysynda qaralmaq.
«2026 jyldyń basynan bastap biýdjet qarajatyn utymdy paidalaný maqsatynda sýbsidiialaý kólemin kezeń-kezeńimen ońtailandyrý jumystary júrgizilýde.
Atap aitqanda, jolaýshylar aǵynyn eskere otyryp, jekelegen avtobýs baǵyttarynyń qozǵalys kestelerine túzetýler engizildi. Jyl boiy sýbsidiialaý boiynsha esep aiyrysýlar buryn qoldanysta bolǵan jáne túzetilgen qarjylandyrý kólemderin eskere otyryp júrgizildi», – dep habarlady vedomstvo.
Sonymen qatar basqarma marshrýttyq jelige, jolaýshylardyń naqty aǵynyna taldaý júrgizilip jatqanyn atap ótti.
Budan bólek, jolaqy tóleminiń deńgeiin arttyrý jáne jolaýshylardy esepke alý dáldigin qamtamasyz etý maqsatynda biryńǵai baqylaý-syzyqtyq qyzmetti engizý jumystary qolǵa alynǵan.
Vedomstvo tasymaldaýshylarǵa bekitilgen josparlarǵa sáikes avtobýstardyń marshrýttarǵa tolyq shyǵýyn qamtamasyz etý qajettigi týraly habarlamalar joldanǵanyn da málimdedi.
Basqarmanyń túsindirýinshe, qabyldanyp jatqan sharalar qoǵamdyq kóliktiń qoljetimdiligi men sapasyn saqtai otyryp, biýdjet qarajatyn tiimdi paidalanýǵa baǵyttalǵan.
