Sozaqta alaman aitys ótti
Aitysqa elimizdiń túkpir-túkpirinen segiz aqyn kelip qatysty. Jalpy, bul aitysty halyqaralyq aitys dese de bolady. Óitkeni Teriskeidegi alaman jyr dodasyna kórshiles Ózbekstannan da aitysker aqyn kelip qatysyp, sóz talastyrdy.Al Pavlodar oblysynan Aspanbek Shuǵataev, Túrkistan oblysynan Jarqynbek Naýshabekov, Shymkent qalasynan Nurlan Esenqulov, Sozaq aýdanynan Qalijan Bildashov, Qyzylorda oblysynan Mereke Aitbai, Astana qalasynan Ainur Kerimbekova, Ózbekstannan Qulmahan Serikbaev, Báidibek aýdanynan Qajymuqan siiaqty elimizge tanymal aitys aqyndary ózara juptasyp baq synasty.
Qazylar alqasynyń tóraǵasy Ábdihalyq Ábdiraiymov, músheleri «Ońtústik Qazaqstan» gazetiniń Sozaq, Báidibek aýdandaryndaǵy tilshisi Maqsat Qarǵabai, Ońtústik Qazaqstan memlekettik pedagogikalyq institýty, filologiia fakýltetiniń syrttai oqytý bóliminiń dekany, ǵalym Nariman Nurpeiis, mádeniet qairatkeri Qurmanbek Jylqybaev, aqyn Baqytjan Aldiiar sekildi óner men jyrdan habary bar jandar barynsha ádil ótkizýge tyrysty.
«Júzden júirik, myńnan tulpar» anyqtalǵan alaman jyr báigesinde bas júlde ( bir million teńge) Túrkistan oblysynan kelgen Jarqynbek Naýshabekovke buiyrdy. Birinshi oryn (500 myń teńge) sozaqtyq Qalijan Bildashovqa, ekinshi oryn (úsh júz myń teńge) kerekýlik Aspanbek Shuǵataevqa, úshinshi oryn (200 myń teńge) shymkenttik Nurlan Esenqulovqa tiesili boldy.
Qalǵan aqyndardyń árqaisysy da yntalandyrý syilyǵyn (100 myń teńgeden) ielendi. Aitys barysynda Jarqynbek pen Qalijannyń qainaǵa men kúieý bala bolyp ózara aitysy óte jarasymdy, syilastyqta ótip kóptiń kóńilenen shyqty.
Sonymen birge, Nurlan men Aspanbektiń arasyndaǵy bolǵan aitys ta kórermender kózaiymyna ie boldy. Júldeli oryndardy aýdan ákimi Salyhan Polatov pen qazylar alqasy aqyndarǵa saltanatty túrde tabys etti.
Osylaisha Teriskeidiń 90 jyldyq mereili merekelik sharasy aiasynda ótken alamanda «Jeńilgen aqyn » bolǵan joq. Barlyǵy qarjylai syi-siiapatqa ie bolyp, jarasymdy syilastyqpen kóńildi tarasty. Aitys sharasyna qolynan kelgenshe demeýshilik jasap, eldiń aq batasyna ie bolǵan, kelgen qonaqtardy kútip alyp, shyǵaryp salyp, rizashylyǵyna bólengen kásipker Erbol Qarnaqbaevtyń azamattyq isin kópke ónegeli óreli is dep aitar edik. Ózi basqaratyn balabaqsha ujymy osy kúni kelgen aqyndar men qazylar alqasyna qaltqysyz qyzmet etti. Sol sebepti, aýdan jurtshylyǵy men kelgen aitysker aqyndar, ádil qazylar atynan Erbol men onyń barsha ujymyna sheksiz alǵysymyzdy bildiremiz.
