ايتىسقا ەلىمىزدىڭ تۇكپىر-تۇكپىرىنەن سەگىز اقىن كەلىپ قاتىستى. جالپى، بۇل ايتىستى حالىقارالىق ايتىس دەسە دە بولادى. ويتكەنى تەرىسكەيدەگى الامان جىر دوداسىنا كورشىلەس وزبەكستاننان دا ايتىسكەر اقىن كەلىپ قاتىسىپ، ءسوز تالاستىردى.ال پاۆلودار وبلىسىنان اسپانبەك شۇعاتايەۆ، تۇركىستان وبلىسىنان جارقىنبەك ناۋشابەكوۆ، شىمكەنت قالاسىنان نۇرلان ەسەنقۇلوۆ، سوزاق اۋدانىنان قاليجان ءبىلداشوۆ، قىزىلوردا وبلىسىنان مەرەكە ايتباي، استانا قالاسىنان اينۇر كەرىمبەكوۆا، وزبەكستاننان قۇلماحان سەرىكبايەۆ، بايدىبەك اۋدانىنان قاجىمۇقان سياقتى ەلىمىزگە تانىمال ايتىس اقىندارى ءوزارا جۇپتاسىپ ب ا ق سىناستى.
قازىلار القاسىنىڭ ءتوراعاسى ءابدىحالىق ءابدىرايىموۆ، مۇشەلەرى «وڭتۇستىك قازاقستان» گازەتىنىڭ سوزاق، بايدىبەك اۋداندارىنداعى ءتىلشىسى ماقسات قارعاباي، وڭتۇستىك قازاقستان مەملەكەتتىك پەداگوگيكالىق ينستيتۋتى، فيلولوگيا فاكۋلتەتىنىڭ سىرتتاي وقىتۋ ءبولىمىنىڭ دەكانى، عالىم ناريمان نۇرپەيىس، مادەنيەت قايراتكەرى قۇرمانبەك جىلقىبايەۆ، اقىن باقىتجان الديار سەكىلدى ونەر مەن جىردان حابارى بار جاندار بارىنشا ءادىل وتكىزۋگە تىرىستى.
«جۇزدەن جۇيرىك، مىڭنان تۇلپار» انىقتالعان الامان جىر بايگەسىندە باس جۇلدە ( ءبىر ميلليون تەڭگە) تۇركىستان وبلىسىنان كەلگەن جارقىنبەك ناۋشابەكوۆكە بۇيىردى. ءبىرىنشى ورىن (500 مىڭ تەڭگە) سوزاقتىق قاليجان ءبىلداشوۆقا، ەكىنشى ورىن (ءۇش ءجۇز مىڭ تەڭگە) كەرەكۋلىك اسپانبەك شۇعاتايەۆقا، ءۇشىنشى ورىن (200 مىڭ تەڭگە) شىمكەنتتىك نۇرلان ەسەنقۇلوۆقا تيەسىلى بولدى.
قالعان اقىنداردىڭ ءارقايسىسى دا ىنتالاندىرۋ سىيلىعىن (100 مىڭ تەڭگەدەن) يەلەندى. ايتىس بارىسىندا جارقىنبەك پەن قاليجاننىڭ قايناعا مەن كۇيەۋ بالا بولىپ ءوزارا ايتىسى وتە جاراسىمدى، سىيلاستىقتا ءوتىپ كوپتىڭ كوڭىلەنەن شىقتى.
سونىمەن بىرگە، نۇرلان مەن اسپانبەكتىڭ اراسىنداعى بولعان ايتىس تا كورەرمەندەر كوزايىمىنا يە بولدى. جۇلدەلى ورىنداردى اۋدان اكىمى سالىحان پولاتوۆ پەن قازىلار القاسى اقىندارعا سالتاناتتى تۇردە تابىس ەتتى.
وسىلايشا تەرىسكەيدىڭ 90 جىلدىق مەرەيلى مەرەكەلىك شاراسى اياسىندا وتكەن الاماندا «جەڭىلگەن اقىن » بولعان جوق. بارلىعى قارجىلاي سىي-سياپاتقا يە بولىپ، جاراسىمدى سىيلاستىقپەن كوڭىلدى تاراستى. ايتىس شاراسىنا قولىنان كەلگەنشە دەمەۋشىلىك جاساپ، ەلدىڭ اق باتاسىنا يە بولعان، كەلگەن قوناقتاردى كۇتىپ الىپ، شىعارىپ سالىپ، ريزاشىلىعىنا بولەنگەن كاسىپكەر ەربول قارناقبايەۆتىڭ ازاماتتىق ءىسىن كوپكە ونەگەلى ورەلى ءىس دەپ ايتار ەدىك. ءوزى باسقاراتىن بالاباقشا ۇجىمى وسى كۇنى كەلگەن اقىندار مەن قازىلار القاسىنا قالتقىسىز قىزمەت ەتتى. سول سەبەپتى، اۋدان جۇرتشىلىعى مەن كەلگەن ايتىسكەر اقىندار، ءادىل قازىلار اتىنان ەربول مەن ونىڭ بارشا ۇجىمىنا شەكسىز العىسىمىزدى بىلدىرەمىز.
