Búgin Sozaq aýdanyna 27 jańa tehnika jetkizilip, kommýnaldyq qyzmet kórsetý mekemelerine tapsyryldy. Tehnikalar 12 kent pen aýyldyq okrýgterge, sondai-aq «Sozaq sáýlet» jáne «Sholaqqorǵan-Sý» memlekettik kommýnaldyq kásiporyndaryna tabystaldy. Jańa tehnikalardy Túrkistan oblysy ákiminiń orynbasary Nurbol Turashbekov tabystap, turǵyndarynyń ómir sapasy men aýyl tazalyǵyn jaqsartý maqsatynda júzege asyrylyp jatqan jańa bastamalardyń mańyzdylyǵyna toqtaldy.
– Jańa tehnikalardyń jetkizilýi tek kommýnaldyq qyzmetterdi jańartyp qana qoimai, aýdannyń taza ári kórikti bolýyna da úlken múmkindik beredi. Aýyldar men eldi mekenderdi abattandyrý, kóshelerdiń tazalyǵy syndy máseleler obylys basshysynyń jiti baqylaýynda. Aýyldarymyzdyń árbir turǵyny taza ortada ómir súrip, týǵan jerine degen súiispenshiligi artsa, bizdiń maqsatymyzdyń oryndalǵany degen sóz. Qoǵamdyq jumysqa jańa tehnika qosylǵan saiyn aýdannyń áleýmettik-ekonomikalyq jaǵdaiy da nyǵaia túsedi, – dedi oblys ákiminiń orynbasary.
Sharada eńbek ardageri, aýdannyń Qurmetti azamaty Búrkit Arynbekov jańa tehnikalar ekologiialyq jáne áleýmettik jaǵdaidy jaqsartýǵa yqpal etetinin atap ótti.
Alynǵan tehnikalar qatarynda LONKING dońǵalaqty tiegish, «Shacman 6x4» júk mashinasy, DongFeng assenizatory, býldozer, KAMAZ-65115 aralas jol kóligi (sýarý, jýý, qar tazalaǵysh) jáne qoqys tasyǵysh KAMAZ-43253 kóligi, JCB 3CX markaly tiegish ekskavator men assenizator mashinasy, sondai-aq Gazel Next avtokóligi satyp alyndy. Bul tehnikalar kommýnaldyq qyzmetterdiń sapasyn arttyrýǵa jáne aýdan infraqurylymyn jańǵyrtýǵa múmkindik beredi. Sonymen qatar barlyq 12 kent jáne aýyldyq okrýgke Belarýs-922.3 markaly traktorlary jetkizildi.
Eske sala ketsek, jyl basynan beri 12 kent jáne aýyldyq okrýgke joǵarǵy keńistiktegi jumystardy ońtailandyratyn elektrli kótergish mashinalary alyndy. Buǵan demeýshilik arqyly alynǵan arnaiy qoqys tasymaldaýǵa arnalǵan jetek, kóshe sypyrý jáne qar tazalaýǵa qajetti jabdyqtarmen tolyqtyrylǵan 5 dana jańa Belarýs 80.1 markaly traktorlary da qosylyp, jańa tehnikalardyń jalpy sany 44-ke jetti.
