بۇگىن سوزاق اۋدانىنا 27 جاڭا تەحنيكا جەتكىزىلىپ، كوممۋنالدىق قىزمەت كورسەتۋ مەكەمەلەرىنە تاپسىرىلدى. تەحنيكالار 12 كەنت پەن اۋىلدىق وكرۋگتەرگە، سونداي-اق «سوزاق ساۋلەت» جانە «شولاققورعان-سۋ» مەملەكەتتىك كوممۋنالدىق كاسىپورىندارىنا تابىستالدى. جاڭا تەحنيكالاردى تۇركىستان وبلىسى اكىمىنىڭ ورىنباسارى نۇربول تۇراشبەكوۆ تابىستاپ، تۇرعىندارىنىڭ ءومىر ساپاسى مەن اۋىل تازالىعىن جاقسارتۋ ماقساتىندا جۇزەگە اسىرىلىپ جاتقان جاڭا باستامالاردىڭ ماڭىزدىلىعىنا توقتالدى.
– جاڭا تەحنيكالاردىڭ جەتكىزىلۋى تەك كوممۋنالدىق قىزمەتتەردى جاڭارتىپ قانا قويماي، اۋداننىڭ تازا ءارى كورىكتى بولۋىنا دا ۇلكەن مۇمكىندىك بەرەدى. اۋىلدار مەن ەلدى مەكەندەردى اباتتاندىرۋ، كوشەلەردىڭ تازالىعى سىندى ماسەلەلەر وبىلىس باسشىسىنىڭ ءجىتى باقىلاۋىندا. اۋىلدارىمىزدىڭ ءاربىر تۇرعىنى تازا ورتادا ءومىر ءسۇرىپ، تۋعان جەرىنە دەگەن سۇيىسپەنشىلىگى ارتسا، ءبىزدىڭ ماقساتىمىزدىڭ ورىندالعانى دەگەن ءسوز. قوعامدىق جۇمىسقا جاڭا تەحنيكا قوسىلعان سايىن اۋداننىڭ الەۋمەتتىك-ەكونوميكالىق جاعدايى دا نىعايا تۇسەدى، – دەدى وبلىس اكىمىنىڭ ورىنباسارى.
شارادا ەڭبەك ارداگەرى، اۋداننىڭ قۇرمەتتى ازاماتى بۇركىت ارىنبەكوۆ جاڭا تەحنيكالار ەكولوگيالىق جانە الەۋمەتتىك جاعدايدى جاقسارتۋعا ىقپال ەتەتىنىن اتاپ ءوتتى.
الىنعان تەحنيكالار قاتارىندا LONKING دوڭعالاقتى تيەگىش، «Shacman 6x4» جۇك ماشيناسى، DongFeng اسسەنيزاتورى، بۋلدوزەر، كاماز-65115 ارالاس جول كولىگى (سۋارۋ، جۋۋ، قار تازالاعىش) جانە قوقىس تاسىعىش كاماز-43253 كولىگى، JCB 3CX ماركالى تيەگىش ەكسكاۆاتور مەن اسسەنيزاتور ماشيناسى، سونداي-اق گازەل Next اۆتوكولىگى ساتىپ الىندى. بۇل تەحنيكالار كوممۋنالدىق قىزمەتتەردىڭ ساپاسىن ارتتىرۋعا جانە اۋدان ينفراقۇرىلىمىن جاڭعىرتۋعا مۇمكىندىك بەرەدى. سونىمەن قاتار بارلىق 12 كەنت جانە اۋىلدىق وكرۋگكە بەلارۋس-922.3 ماركالى تراكتورلارى جەتكىزىلدى.
ەسكە سالا كەتسەك، جىل باسىنان بەرى 12 كەنت جانە اۋىلدىق وكرۋگكە جوعارعى كەڭىستىكتەگى جۇمىستاردى وڭتايلاندىراتىن ەلەكترلى كوتەرگىش ماشينالارى الىندى. بۇعان دەمەۋشىلىك ارقىلى الىنعان ارنايى قوقىس تاسىمالداۋعا ارنالعان جەتەك، كوشە سىپىرۋ جانە قار تازالاۋعا قاجەتتى جابدىقتارمەن تولىقتىرىلعان 5 دانا جاڭا بەلارۋس 80.1 ماركالى تراكتورلارى دا قوسىلىپ، جاڭا تەحنيكالاردىڭ جالپى سانى 44-كە جەتتى.
