Túrkistan oblysy Sozaq aýdanyna sońǵy 5 jylda alǵash ret 1 mlrd 380 mln tekshe metr sý keldi. Bul ótken jylmen salystyrǵanda 300 mln tekshe metrge kóp. Eń aldymen, Tasótkel sý qoimasy jóndelip, syiymdylyǵy 450 mln tekshe metrden 620 mln tekshe metrge deiin ulǵaityldy. Bul Sozaq aýdanyna qosymsha 200 mln tekshe metr sý jiberýge múmkindik beredi. Bul jóninde Sý resýrstary jáne irrigatsiia ministri Nurjan Nurjigitov aýdan turǵyndarymen ótken kezdesýde aityp ótti, dep habarlaidy Dalanews.kz
Sondai-aq aimaqty sýmen qamtý baǵytyndaǵy atqarylǵan jumystar týraly baiandap, aldaǵy josparlaryn bólisti.
«Bizdiń ministrlik Sozaq aýdanyna turaqty túrde sý jiberýge nietti. Ol úshin birqatar mańyzdy jobalar júzege asyrylyp jatyr. Biyl Shý ózeniniń sýyn saýatty bólý men retteýdiń nátijesinde Sozaq aýdanyna sý ádettegiden 1 aiǵa erte keldi. Qazirdiń ózinde ótken jyldan 300 mln tekshe metrge artyq sý jiberdik. Biz bunymen toqtamaimyz. Mamyr aiyna deiin sekýndyna 85 tekshe metrden sý jiberýdi josparlap otyrmyz», dedi Sý resýrstary jáne irrigatsiia ministri Nurjan Nurjigitov.
Jýantóbe aýyly aýmaǵynda ótken jiynǵa Túrkistan oblysy ákiminiń orynbasary Nurbol Turashbekov, aýdan ákimi Muhit Turysbekov, aýdandyq máslihat tóraǵasy Ordabek Jámiev jáne sý sharýashylyǵy mamandary qatysty.
Jiynda «Fýrmanov» kanalynyń jai-kúii de sóz boldy. Túrkistan oblysy ákiminiń orynbasary Nurbol Turashbekov 120 shaqyrymdyq ainalma kanaldyń qurylymyn qalpyna keltirý, tazartý jáne jóndeý jumystaryn júrgizý úshin qajetti qujattardy rásimdeý jumystary júrip jatqandyǵyn málimdedi. Bul másele oblys ákiminiń jeke baqylaýynda ekenin jáne atalǵan jumys shilde aiynda bastalatyndyǵyn da atap ótti.
