Qazaq Air-dy satyp alǵan Vetnamnyń Sovico Group kompanıasy Qazaqstandaǵy áýejaıdy óz basqarýyna alý týraly josparyn keıinge shegere turmaq. Bul týraly Premer-mınıstrdiń orynbasary – Ulttyq ekonomıka mınıstri Serik Jumanǵarın málimdedi. Bastapqyda kompanıa Aqtóbe jáne Túrkistan oblystarynan áýejaılardy jalǵa alýdy qarastyrǵan eken, dep habarlaıdy Dalanews.kz.
Jumanǵarın ótken aıda vetnamdyq kompanıa Qazaqstanda áýejaı satyp alý nemese ony basqarýǵa alý múmkindigin qarastyryp jatqanyn aıtqan edi. Keıin Syrtqy ister vıse-mınıstri Álibek Baqaev bul máseleniń Qyzylorda oblysyndaǵy áýejaıǵa qatysty aıtylǵanyn jetkizgen.
Alaıda, qazirgi ýaqytta atalǵan máseleni qarastyrý jaıy keıinge qaldyrylǵany belgili boldy. Jumanǵarınniń aıtýynsha, bastapqyda vetnamdyq kompanıa Aqtóbe jáne Túrkistan oblystaryndaǵy áýejaılardy qarastyryp kóripti.
"Meniń bilýimshe, kompanıa bul baǵyttaǵy jumysty, ázirge toqtatty. Bul arada áýejaıdy bútindeı satyp alý týraly sóz bolyp otyrǵan joq. Olar áýejaı bazasy bolýy úshin olardy basqarýǵa alǵysy kelgen. Biraq bul másele sheshimi de keıinge qaldyryldy, óıtkeni áýe kompanıany damytý úshin olarda jetkilikti mólsherde úlken ınvestısıa bar. Olar kelesi kezeńdi áýejaıdy satyp alý nemese ony basqarýǵa alý jaıyn qarastyrady. Qalaı degenmen de eger áýe kompanıa bolsa, oǵan báribir bazalyq áýejaı qajet bolady", – dep atap ótti Májilistegi brıfıń barysynda Jumanǵarın.
Aıta ketsek, Qazaq Air 2023 jyly satylymǵa qoıyldy: 18 tamyzda "Samuryq-Qazyna" AQ qoryna tıesili avıakompanıanyń 49%-dan 100%-ǵa deıingi aksıalaryn satýǵa arnalǵan ashyq eki kezeńdik konkýrstyń bastalǵany habarlandy. Aksıalardyń bastapqy ári eń tómengi baǵasy 10,2 mlrd teńge bolyp belgilendi. Aktıvti birden satý múmkin bolmady. 2023 jyldyń 13 qarashasynda jarıalanǵan konkýrs ótkizilmedi dep tanyldy. 2024 jyldyń qańtarynda "Samuryq-Qazyna" qaıta konkýrs jarıalady, alaıda ekinshisi de sátsiz boldy. Qazaq Air-dy satyp alatyn ınvestordyń tabylǵany 2024 jylǵy 23 mamyrda belgili boldy: Qazaqstan prezıdenti Qasym-Jomart Toqaev Sıngapýrdaǵy bıznes-forýmda sóılegen sózinde vetnamdyq Sovico Group áýe kompanıasynyń usynysyn qoldap, pikir bildirdi. Biraq bul kelissózdiń ózi de bir jylǵa sozyldy.
Buǵan deıin saıtymyzda "Vetnamdaǵy tuńǵysh mıllıarder áıel jáne Qazaqstan" degen maqala jarıalanǵan bolatyn.
