Sot otyrysynda Núkenovanyń qurbysy Aida Ahmedina qaitadan sot zalyna kelip, Saltanat ekeýiniń dialogyn oqyp berdi, - dep habarlaidy Dalanews.kz.
Dialogtardyń birinde Saltanat Bishimbaev uiqy bermeitinin aitqan.
Saltanat: Ol maǵan uiqy bermeidi, ózi de túnde uiyqtamaidy.
Aida: Sen uiyqtap jatqan kezde ol ári-beri júre me sonda?
Saltanat: Paranoidtyq oilar kóp oilaidy. Ashýlanady, aiǵailaidy. Eki kún uiyqtamaǵanymdy aittym. Ol maǵan "demek seniń maǵan pysqyrǵanyń bar" deidi. Shynymdy aitsam, ony aiaimyn. Aýrý adam. Kómektesýge tyrystym.
Aida: Árine.
Saltanat: Onyń kinási joq ta shyǵar, bilmeimin.
Aida: Osylai týdy ma, álde júre kele osyndai bolǵan adam ba?
Saltanat: Psihiatriialyq aýrýhanada jatyp shyǵýy kerek shyǵar. Biraq ózimdi oilaýym kerek. Bala bosanýǵa qorqamyn. Nekemizdi tirkegim kelmeidi.
Eske salaiyq, buǵan deiin de Qýandyq Bishimbaev isine qatysty sot otyrysynda prokýror Saltanat Núkenova men qurbysy Aida Ahmedinanyń dialogyn oqyp shyqqan bolatyn.
Prokýror Ahmedina men Núkenovanyń 2023 jyly 19 sáýirdegi dialogyn oqyp shyqty. Saltanat Núkenova túngi eki shamasynda qurbysyna jazyp, advokat keregin aitqan.
Ol meniń zattarymdy bermeidi. Jalǵyz kele almaimyn, aǵam nemese ákemmen barýym kerek. Kez kelgen nársege daiyn bolýym kerek. Maǵan eshteńe kerek emes. Tek zattarymdy alyp ketsem boldy", - dep jazǵan Saltanat qurbysyna.
Aida Ahmedina qandai kómek keregin suraǵan.
"Ol meni jaidan-jai jibere salýy ekitalai. Ol meni urǵan sýretim bar. Ol sýret Aitymda (Saltanattyń aǵasy) da bar. Betimde saý jer qalmaǵan", - deidi Saltanat.
Osy kezde Saltanat aǵasy Aitym men Bishimbaevtyń tóbelesip qalǵan kezi týraly áńgimelep bergen.
"Ol meni urǵan kezdegi sýretter bar bolǵandyqtan meni jibermeitinin aitty. Biz oǵan osy sýrettermen qoqan-loqy kórsetemiz dep oilaidy. Sol sýretterdi jariialap, aqsha talap etedi dep oilaidy. Meni jalańash videoǵa túsýimdi surady. Osylai ózine de kepildik jasap almaq. Oǵan (Bishimbaevqa) eshkim qoqan-loqy kórsetpeýi úshin túsirtti. "Monstrsyń" dedim. Biraq meni videosyz jibermeitinin bildim", - deidi Saltanat.
"Sonda video túsirdiń be?", - dep suraǵan qurbysy.
"Iá, ketý úshin túsirdim. Basqa amalym bolmady. Sharshap kettim. Basqa eshkimmen aralaspaimyn. Meniń ár qadamymdy, ár hatty, ár qońyraýdy baqylap otyrady. Telefondy artyq ustamaimyn. Jaidan-jai ashýlanyp, aiǵailap, kemsite salady. Ábden qaljyrap bittim. Janjal shyǵyp ketpesin dep úndemei, qoia salamyn. Maniak siiaqty jaqsy kóredi, bul mahabbat emes", - deidi Saltanat.
"Sumdyq qoi, janym", - deidi Ahmedina.
"Men onyń aitqandaryn 24/ 7 isteýim kerek. Qarsy shyqsam janjal bastalady. Kún saiyn janjal. Almatyda zattarymdy jinap, ketkim kelgen kezde shashymdy julyp aldy. Mundai jaǵdai birneshe ret boldy. Shashymdy julyp, aiǵailaidy", - deidi Saltanat.
