Temirtaý qalasynda buryn sýdia bolyp eńbek etken zeinetker Prezident Qasym-Jomart Toqaevqa ashyq úndeý jasady. Ol óz sózinde ádilet izdep talai jyldan beri sot tabaldyryǵyn tozdyrǵanyn aitty, dep habarlaidy Dalanews.kz.
Eks-sýdianyń videosy "Pisma Prezidentý" telegram arnasynda jariialandy.
“1999 jylǵa deiin halyq sotynda qyzmet atqardym. Sot degenimiz – halyq úshin ádilet ordasy bolýy kerek. Biraq qazirgi jaǵdai múlde kerisinshe: ádilet emes, ádiletsizdik jii oryn alyp jatyr”, – deidi burynǵy sýdia.
Onyń aitýynsha, 1997 jyly onyń atynan jalǵan senimhat rásimdelip, jalǵyz baspanasy zańsyz túrde úshinshi tulǵalarǵa berilgen. Alaida azamatsha eshqandai senimhat bermegenin, qol qoimaǵanyn aityp, bul áreketti zańsyz dep esepteidi.
“Sotqa shaǵymdanyp, qoltańbamdy saraptamadan ótkizýdi suradym. Sot muraǵatynan meniń burynǵy qoltańbalarymdy alyp, salystyrýdy talap ettim. Biraq sot meniń ótinishimdi qanaǵattandyrmai, ‘qujattar saqtalmaǵan’ dep jaýap berdi. Al zań boiynsha mundai qujattar turaqty túrde saqtalýy kerek edi”, – deidi ol.
Zeinetker Prezidentten “estitin memleket” tujyrymdamasyna sai naqty áreket jasaýdy talap etti.
“Siz ádiletti Qazaqstan quramyz dedińiz. Endeshe, sot júiesinde de ádildik ornasyn. Zań ústemdigi men sottyń táýelsizdigi – halyqtyń memleketke degen seniminiń negizi. Sol senimdi qaitaryńyz”, – dep túiindedi ol óz úndeýin.
