تەمىرتاۋ قالاسىندا بۇرىن سۋديا بولىپ ەڭبەك ەتكەن زەينەتكەر پرەزيدەنت قاسىم-جومارت توقايەۆقا اشىق ۇندەۋ جاسادى. ول ءوز سوزىندە ادىلەت ىزدەپ تالاي جىلدان بەرى سوت تابالدىرىعىن توزدىرعانىن ايتتى، دەپ حابارلايدى Dalanews.kz.
ەكس-سۋديانىڭ ۆيدەوسى "پيسما پرەزيدەنتۋ" تەلەگرام ارناسىندا جاريالاندى.
“1999 جىلعا دەيىن حالىق سوتىندا قىزمەت اتقاردىم. سوت دەگەنىمىز – حالىق ءۇشىن ادىلەت ورداسى بولۋى كەرەك. ءبىراق قازىرگى جاعداي مۇلدە كەرىسىنشە: ادىلەت ەمەس، ادىلەتسىزدىك ءجيى ورىن الىپ جاتىر”، – دەيدى بۇرىنعى سۋديا.
ونىڭ ايتۋىنشا، 1997 جىلى ونىڭ اتىنان جالعان سەنىمحات راسىمدەلىپ، جالعىز باسپاناسى زاڭسىز تۇردە ءۇشىنشى تۇلعالارعا بەرىلگەن. الايدا ازاماتشا ەشقانداي سەنىمحات بەرمەگەنىن، قول قويماعانىن ايتىپ، بۇل ارەكەتتى زاڭسىز دەپ ەسەپتەيدى.
“سوتقا شاعىمدانىپ، قولتاڭبامدى ساراپتامادان وتكىزۋدى سۇرادىم. سوت مۇراعاتىنان مەنىڭ بۇرىنعى قولتاڭبالارىمدى الىپ، سالىستىرۋدى تالاپ ەتتىم. ءبىراق سوت مەنىڭ ءوتىنىشىمدى قاناعاتتاندىرماي، ‘قۇجاتتار ساقتالماعان’ دەپ جاۋاپ بەردى. ال زاڭ بويىنشا مۇنداي قۇجاتتار تۇراقتى تۇردە ساقتالۋى كەرەك ەدى”، – دەيدى ول.
زەينەتكەر پرەزيدەنتتەن “ەستيتىن مەملەكەت” تۇجىرىمداماسىنا ساي ناقتى ارەكەت جاساۋدى تالاپ ەتتى.
“ءسىز ادىلەتتى قازاقستان قۇرامىز دەدىڭىز. ەندەشە، سوت جۇيەسىندە دە ادىلدىك ورناسىن. زاڭ ۇستەمدىگى مەن سوتتىڭ تاۋەلسىزدىگى – حالىقتىڭ مەملەكەتكە دەگەن سەنىمىنىڭ نەگىزى. سول سەنىمدى قايتارىڭىز”، – دەپ تۇيىندەدى ول ءوز ۇندەۋىن.
