Búgin Semeıde sot Muhtar Jákishevtiń sharty túrde merziminen buryn bosatý týraly ótinishin qarady.
"Qazatomónerkásip" ulttyq kompanıasynyń eks-basshysy Muhtar Jákishevtiń sharty túrde merziminen buryn bosatý týraly ótinishin sot qanaǵattandyrmady.
Otyrys kezinde Muhtar Jákishevtiń advokaty Nurlan Beısekeev eki saǵatqa jýyq sóz sóıledi. Onyń aıýtynsha, túrmede otyrǵan Jákishevtiń densaýlyǵy nasharlap ketti. Ol birneshe aýrýǵa dýshar boldy. Biraq áli kúnge deıin tolyqqandy medısınalyq tekseristen ótken joq. Búginde ol biraz dárini iship, emdelýge májbúr. III toptaǵy múgedek týraly anyqtamasy bar.
"Muhtar Jákishev "Qazatomónerkásip" ulttyq kompanıasy bankrotqa jaqyn turǵanda basshylyqqa keldi. Bul bizdiń prezıdentimizdiń ótinishi edi. Muhtar Erkinuly qysqa ýaqyttiń ishinde kompanıany kóterdi, "ekonomıkalyq monstrǵa" aınaldyrdy deýge bolady. Kóptegen iri kompanıalar "Qazatomónerkásipke" qarap, boı túzedi. İri memleketter Qazaqstanmen áriptest bolýǵa umtyldy. Muhtar Jákishev atom energetıkasy salasyndaǵy ǵylymdy damytýdy kózdedi. Ondaı adamǵa izgi kózqaraspen qaraý qajet", - dedi Beısekeev.
Qorǵaýshylardyń sózine qaraǵanda, sotqa deıin "Qazatomónerkásip" ulttyq kompanıasy tarapynan materıaldyq shyǵyn keltirgeni týraly aryz-shaǵym túspedi. Búgingi sot otyrysyna da kompanıanyń ókilderi kelgen joq.
"Osynyń ózi kompanıa tarapynan aryz-shaǵymnyń joq ekenin kórsetip otyr. Muhtar Jákishev túrmede, al "Qazatomónerkásip" ulttyq kompanıasy baıyp jatyr", - deıdi qorǵaýshylar.
Dárigerler Jákishevtiń densaýlyǵyna qatysty aqparatty rastady. Túrme ókilderi de Jákishevti shartty túrdi merziminen buryn bosatýǵa bolatynyn málimdedi.
Jákishev óz kezeginde buǵan deıin bolǵan sot otyrystaryn eske alyp, ózine taǵylǵan aıyptardyń negizsiz ekenin jetkizdi. Al prokýror sottalǵandy merziminen buryn bosatýǵa qarsylyq bildirdi. Sot Jákishevtiń ótinishin qanaǵattandyrmady.
Aıta keteıik, Muhtar Jákishev 2009 jyly mamyr aıynda tutqyndalǵan bolatyn. Kelesi jyly ony 14 jylǵa bas bostandyǵynyn aıyrý týraly sheshim shyǵaryldy. Ótken jyly túrmedegi merzimniń jartysynan kóbi ótti. Osyǵan baılanysty Jákishev shartty túrde merziminen buryn bosatýǵa ótinish bildirdi. Alaıda Semeı qalasynyń soty atalǵan ótinishi qoldaǵan joq.
Byltyr shilde aıynda Jákishevti Semeıdegi OV-156/14 kolonıasyna aýystyrdy. Buǵan deıin ol Almaty oblysyndaǵy Zarechnyı aýylynda jáne Qaraǵandy oblysyndaǵy Dolınka eldi mekenindegi túrmede otyrdy.
Derekkóz: sputniknews.kz
