Túrkistan oblysynda aǵymdaǵy jyldyń 9 aıynda 30 436 otbasyǵa (173 620 adam) jalpy somasy 12769 mln.teńge kóleminde ataýly áleýmettik kómek taǵaıyndalǵan.
Búgin bul týraly Túrkistan oblysynyń Óńirlik komýnıkasıalar qyzmetinde ótken brıfıńte Jumyspen qamtýdy úılestirý jáne áleýmettik baǵdarlamalar basqarmasynyń basshysy Muhıt Otarshıev málimdedi.
Basqarma basshysynyń aıtýynsha, shartty aqshalaı kómek alýshylardyń óz kásibin ashý úshin kishi bıznes jobalar ázirlenip, nátıjesinde 15 127 otbasy 17 myńǵa jýyq iri qara mal jáne 14 500 ýaq mal alyp, 1689 otbasy qus sharýashylyǵymen shuǵyldanyp otyr.
Sondaı-aq, halyqqa qyzmet kórsetý arqyly jalpy 15 127 otbasy ishinen 2580 adam óz isin ashqan.
Aıta keterligi, respýblıkanyń soltústik óńirlerine halyqtyń óz erkimen qonys aýdarýy jandanyp keledi. Atalǵan kezeńde oblysymyzdan 263 otbasy, ıaǵnı 1112 adam qonys aýdaryp, tıisti tólemderdi alýda. Bul respýblıka boıynsha soltústikke qonys aýdarǵan adamdardyń 40 paıyzyn qurap otyr
- dedi Muhıt Baımuhanbetuly.
Sonymen qatar, múmkindigi shekteýli azamattar men ardagerlerdi áleýmettik qoldaý boıynsha aǵymdaǵy jyly barlyq búdjetter esebinen 8,6 mlrd. teńge qaralyp, múmkindigi shekteýli azamattar 64 myńǵa jýyq tehnıkalyq kómekshi quraldarmen jáne áleýmettik qyzmettermen qamtamasyz etilgen.
Zeınetkerlerge áleýmettik qoldaý kórsetý boıynsha 7800 zeınetker basqarmaǵa qarasty «Ardagerler» jáne «Meıir» saýyqtyrý keshenderine joldama alǵan. 80 jastan asqan jalǵyzilikti 310 qarıanyń zeınetaqylaryna aı saıyn jergilikti búdjet esebinen 1 aılyq eseptik kórsetkish mólsherinde kómek berilip keledi.
Aǵymdaǵy jyldyń 1 qazanyndaǵy kórsetkish boıynsha oblysta arnaýly áleýmettik qyzmettermen muqtaj azamattardyń 99,7 paıyzy qamtylǵan.
Foto: otyrar.kz
