تۇركىستان وبلىسىندا اعىمداعى جىلدىڭ 9 ايىندا 30 436 وتباسىعا (173 620 ادام) جالپى سوماسى 12769 ملن.تەڭگە كولەمىندە اتاۋلى الەۋمەتتىك كومەك تاعايىندالعان.
بۇگىن بۇل تۋرالى تۇركىستان وبلىسىنىڭ وڭىرلىك كوممۋنيكاسيالار قىزمەتىندە وتكەن بريفينگتە جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى مۇحيت وتارشييەۆ مالىمدەدى.
باسقارما باسشىسىنىڭ ايتۋىنشا، شارتتى اقشالاي كومەك الۋشىلاردىڭ ءوز كاسىبىن اشۋ ءۇشىن كىشى بيزنەس جوبالار ازىرلەنىپ، ناتيجەسىندە 15 127 وتباسى 17 مىڭعا جۋىق ءىرى قارا مال جانە 14 500 ۋاق مال الىپ، 1689 وتباسى قۇس شارۋاشىلىعىمەن شۇعىلدانىپ وتىر.
سونداي-اق، حالىققا قىزمەت كورسەتۋ ارقىلى جالپى 15 127 وتباسى ىشىنەن 2580 ادام ءوز ءىسىن اشقان.
ايتا كەتەرلىگى، رەسپۋبليكانىڭ سولتۇستىك وڭىرلەرىنە حالىقتىڭ ءوز ەركىمەن قونىس اۋدارۋى جاندانىپ كەلەدى. اتالعان كەزەڭدە وبلىسىمىزدان 263 وتباسى، ياعني 1112 ادام قونىس اۋدارىپ، ءتيىستى تولەمدەردى الۋدا. بۇل رەسپۋبليكا بويىنشا سولتۇستىككە قونىس اۋدارعان ادامداردىڭ 40 پايىزىن قۇراپ وتىر
- دەدى مۇحيت بايمۇحانبەت ۇلى.
سونىمەن قاتار، مۇمكىندىگى شەكتەۋلى ازاماتتار مەن ارداگەرلەردى الەۋمەتتىك قولداۋ بويىنشا اعىمداعى جىلى بارلىق بيۋدجەتتەر ەسەبىنەن 8،6 ملرد. تەڭگە قارالىپ، مۇمكىندىگى شەكتەۋلى ازاماتتار 64 مىڭعا جۋىق تەحنيكالىق كومەكشى قۇرالدارمەن جانە الەۋمەتتىك قىزمەتتەرمەن قامتاماسىز ەتىلگەن.
زەينەتكەرلەرگە الەۋمەتتىك قولداۋ كورسەتۋ بويىنشا 7800 زەينەتكەر باسقارماعا قاراستى «ارداگەرلەر» جانە «مەيىر» ساۋىقتىرۋ كەشەندەرىنە جولداما العان. 80 جاستان اسقان جالعىزىلىكتى 310 قاريانىڭ زەينەتاقىلارىنا اي سايىن جەرگىلىكتى بيۋدجەت ەسەبىنەن 1 ايلىق ەسەپتىك كورسەتكىش مولشەرىندە كومەك بەرىلىپ كەلەدى.
اعىمداعى جىلدىڭ 1 قازانىنداعى كورسەتكىش بويىنشا وبلىستا ارناۋلى الەۋمەتتىك قىزمەتتەرمەن مۇقتاج ازاماتتاردىڭ 99،7 پايىزى قامتىلعان.
فوتو: otyrar.kz
