Qazaqstannyń soltústik jáne shyǵys óńirlerinde jylytý maýsymyn aýa raiyna qarai 1 qazanǵa deiin bastaý josparlanyp otyr, dep habarlaidy Dala News.
Bul týraly Úkimet otyrysynda Energetika ministri Erlan Aqkenjenov málimdedi.
«14 qyrkúiekten bastap Pavlodar oblysynda jylytý maýsymy bastaldy. Bul jumystardy Soltústik jáne shyǵys óńirlerde aýa raiynyń kórsetkishterine qarai 1 qazanǵa deiin bastaý kútilýde», – dedi ministr.
Energiia kózderinde jylytý maýsymyn bastaýǵa qajetti otyn qory qalyptastyrylǵan. Qazir 4,9 mln tonna kómir jáne 127 myń tonna mazýt bar.
Sonymen qatar 4 energiia blogynda, 30 qazandyqta jáne 19 týrbinada jóndeý jumystary aiaqtalǵan. 17 myń shaqyrym elektr berý jelilerin jóndeý tolyq oryndalǵan.
Jylý jelilerin daiyndaý jumystarynyń jalpy deńgeii 97 paiyzǵa jetti. Josparlanǵan 377 shaqyrymnyń 366 shaqyrymy daiyn.
Úkimettiń erekshe baqylaýynda Ulytaý jáne Abai oblystaryndaǵy, sondai-aq Soltústik Qazaqstan men Aqmola oblystaryndaǵy jylý berý nysandary tur.
Sátbaev qalasynda jylý magistralin jańǵyrtý aiaqtalǵan. Qazir jelini tazalaý jáne qysymmen synaý jumystary júrgizilip jatyr.
Petropavl qalasynyń jylý magistraldarynyń daiyndyǵy 95 paiyzdy quraidy. Jumystardy osy aptanyń sońyna deiin aiaqtaý josparlanǵan.
Stepnogorsk qalasynda jylý jelileriniń daiyndyǵy 76 paiyzǵa jetti. Jumystardy 25 qyrkúiekke deiin aiaqtaý kózdelip otyr.
Semei qalasynda úsh joba boiynsha jumystardyń oryndalýy 70 paiyzdy quraidy. Qajetti sýtartqysh qurylǵylar men jylý almastyrǵyshtardy 26 qyrkúiekte jetkizý josparlanǵan.
