Reseıde Ýkraınadaǵy soǵysqa baryp kelgen áskerı qyzmetkerler myńnan asa adamǵa ólim nemese aýyr jaraqat keltirgen, dep habarlaıdy Dalanews.kz.

Sotqa jetken ár on istiń toǵyzy boıynsha aıyptalýshynyń soǵysqa qatysqany «jeńildetetin jaǵdaı» retinde eseptelgen. Mundaı derekterdi «Verstka» men Die Welt birlesken zertteýinde keltirdi.

Zertteý qorytyndysyna saı, Reseı Ýkraınaǵa qarsy keń aýqymdy soǵys bastaǵan sátten beri maıdannan oralǵan áskerı adamdardyń áreketinen 551 adam kóz jumǵan. Onyń 274-i – qasaqana kisi qolynan qaza tapqan, al 163-i – soqqyǵa jyǵylý nemese jol apatynan alǵan jaraqat saldarynan ólgen. Qylmysqa barǵandardyń 142-si buryn sottalǵan, túrmeden soǵysqa shaqyrylǵan adamdar.

Zertteýshiler qaraǵan 700 sot úkiminiń shamamen 90%-ynda sot soǵysqa qatysýdy kinálige jeńildik beretin jaıt retinde qabyldaǵan. Ádette kisi óltirý men ólimge ákep soqqan kúsh qoldaný qylmystary ishimdik ishilip, turmystyq nemese jeke janjal kezinde jasalǵan. Kóp jaǵdaıda mundaı oqıǵalardyń qurbandary áskerı qyzmetkerlerdiń óz týystary men jaqyndary bolyp shyqqan.