Álihan Smaiylov Úkimetiniń attan túsip, atqarýshy bilikke Oljas Bektenovtyń kelip, jańa Úkimetti jasaqtaýyna reseishil telegram arnalar óziniń keri reaktsiiasyn kórsetip úlgerdi dep jazady Dalanews.kz.
Álihan Smaiylov Úkimeti otstavkaǵa keter aldynda Almatyda ótken Eýraziialyq odaqqa múshe elderdiń úkimetaralyq keńesiniń kezekti otyrysynda Odaqqa múshe elderdi Qazaqstannyń kólik-logistika salasyn birlesip damytýǵa shaqyrǵan bolatyn.
Munyń aldynda elimizdegi 20 áýejai men Kaspii jaǵalaýyndaǵy mańyzdy porttar Batys elderiniń investorlaryna berilgeni jaiyndaǵy aqparat taraǵan edi. Sol kezde Kremldiń soiylyn soǵatyn arnalar ertoqymyn baýyryna alyp týlaǵany da esimizde.
Smaiylov muny bile tura, Eýraziialyq odaqqa múshe elderdiń investorlaryn Qazaqstannyń kólik-logistika salasyn damytýǵa shaqyrýyn túsine almadyq. Tipti, muny provokatsiia dep qabyldaýǵa da bolar ma edi?..
Dál qazir Eýraziialyq odaqta Reseiden basqa elderde elimizge investitsiia sala qoiatyn múmkindigi joq. Osydan-aq Smaiylovtyń resmi Máskeýdiń qolaiyna jaǵatyn premer bolǵanyn baiqaisyń.
Al jańa Premer-ministr Oljas Bektenovtiń Smaiylov sekildi namazyn Reseige qarap oqymaityny Kremldiń keýdesine qanjardai qadalýda. Sol sebepti reseishil telegram arnalar Bektenovty kústanalap, ulardai shýlap jatyr.
Pýtinniń qas-qabaǵyna qarap aqparat taratatyn arnalar:
«Qazaqstanda Úkimet basyna kelgen Bektenov eks-prezident Nazarbaevtyń adamdaryn bilik vertikalynan yǵystyryp, Astanany Máskeýden alystata túsetin kadr» dep áńgime aita bastady.
Osylaisha propogandister Eski Qazaqstannyń ókilderin Bektenov Úkimetine qarsy qoiýǵa jantalasýda. Resmi Máskeý elimizdiń saiasi elitasyn «eski, jańa» dep bólshektep Qazaqstandaǵy saiasi yqpalyn saqtap qalýǵa kúsh salýda.
Atqarýshy biliktiń tizgin-shylbyryn qolǵa alǵan Oljas Bektenovty reseilik arnalar kúshtik qurylymdardyń ókili retinde kórsetýge tyrysyp baǵýda.
Iá, onyń sońǵy jyldary Bektenovtyń Antikordy basqaryp, biraz jemqorlardy ustap, prezident Toqaevtyń qolynan general- leitenant shenin alǵanyn bilemiz.
Biraq qazaqtar jańa premer arnaiy qyzmette jumys istep, Másimov sekildi las tirlikke aralaspaǵanyn basty nazarda ustaýy tiis. Qaita kerisinshe, memleket qazynasyna qol salǵandardy quryqtap, sybailas jemqorlyqtyń jolyn keskenin nazarda ustaý mańyzdy. Bizdińshe, Oljas Bektenovty zań salasynyń mamany dep qarastyrý kerek.
Endi negizgi áńgimemizge qaita oralsaq, Pýtinniń basty propagandisteriniń biri Margarita Simoniannyń baqylaýyndaǵy "Brifing" arnasy Bektenovty "Astana men Máskeýdiń arasyn alystatatyn tulǵa" retinde kórsetýge barynsha kúsh salypty.
Arnanyń aqparatyna sensek, Bektenov Astana men Máskeýdiń arasyn alystatyp, Qytai men Batys elderi arasyndaǵy bailanysyn kúsheitip, Qazaqstandy Orta Aziiadaǵy kóshbasshy elge ainaldyrmaqshy.
Árine, kez kelgen Qazaqstan azamaty bul baǵytty qoldaityny anyq. Kerek deseńiz, bul Bektenovtyń emes, prezident Toqaevtyń birneshe jyldan beri júzege asyryp kele jatqan saiasaty emes pe? Biraq Kreml propagandisteri Bektenovten Smaiylov jasai almaitynyn túsinbei otyr.
Ras, Bektenov Qazaqstandy jemqorlyqtan tazartýda kóp eńbek sińirdi. Ol Antikordy basqarǵan ýaqytta Nazarbaev otbasyna jaqyn Qairat Satybaldy men Qairat Boranbaevtyń ishken-jegenin qustyryp, zań aldynda aiybyn moinyna qoiyp berdi.
Jalpy, Qańtar oqiǵasynan keiin Qazaqstanda jemqorlyqpen kúres, shetke shyqqan aktivterdi elge qaitarý isi údei túsýi kútilgen jaǵdai emes pe? Muny halyq Toqaevtan da, Bektenovtyń aldyndaǵy Úkimetti basqarǵan Smailovtan da talap etti.
Aitpaqshy, Bektenovtyń jemqorlyqpen kúreste Qazaqstandy Eýropa keńesindegi korrýptsiiaǵa qarsy elderdiń tobyna qosýy Kremldiń búiirine shanshýdai qadalǵan. Óitkeni resmi Máskeý Qazaqstannyń EýroOdaq elderimen integratsiialyq qadamdarǵa barýyn qoldamaitynyn bilemiz. Bektenov osy áreketimen Pýtinge jaqpai qalýy ábden múmkin.
Pýtinniń shashbaýyn kóterip júrgen massa-media Bektenov Úkimeti Reseimen aradaǵy bailanystyń jańa modelin qalyptastyrady dep qaýiptenýde.
Óz basymyz Bektenov Úkimetiniń Pýtinniń qas-qabaǵyna qaramai elimizdiń derbes ekonomikalyq saiasatyn júrgizýinen eshqandai oǵash qylyq kórip turǵanymyz joq.
Reseige sanktsiia salǵan Batys elderimen aradaǵy bailanysty salqyndatý bizge tiimsiz. Bul rette Kreml Qazaqstan Reseidiń aitqanyna kónip, qosaq arasynda júre beretin Belarýs emesin túsinýi kerek.
Bul Bektenovtyń tańdaýy emes, halyqtyń, Prezident tańdaýy ekenin Kreml propagandisteriniń esine salatyn kez jetti.
