ەليحان سمايىلوۆ ٷكٸمەتٸنٸڭ اتتان تٷسٸپ, اتقارۋشى بيلٸككە ولجاس بەكتەنوۆتىڭ كەلٸپ, جاڭا ٷكٸمەتتٸ جاساقتاۋىنا رەسەيشٸل تەلەگرام ارنالار ٶزٸنٸڭ كەرٸ رەاكتسيياسىن كٶرسەتٸپ ٷلگەردٸ دەپ جازادى Dalanews.kz.
ەليحان سمايىلوۆ ٷكٸمەتٸ وتستاۆكاعا كەتەر الدىندا الماتىدا ٶتكەن ەۋرازييالىق وداققا مٷشە ەلدەردٸڭ ٷكٸمەتارالىق كەڭەسٸنٸڭ كەزەكتٸ وتىرىسىندا وداققا مٷشە ەلدەردٸ قازاقستاننىڭ كٶلٸك-لوگيستيكا سالاسىن بٸرلەسٸپ دامىتۋعا شاقىرعان بولاتىن.
مۇنىڭ الدىندا ەلٸمٸزدەگٸ 20 ەۋەجاي مەن كاسپيي جاعالاۋىنداعى ماڭىزدى پورتتار باتىس ەلدەرٸنٸڭ ينۆەستورلارىنا بەرٸلگەنٸ جايىنداعى اقپارات تاراعان ەدٸ. سول كەزدە كرەملدٸڭ سويىلىن سوعاتىن ارنالار ەرتوقىمىن باۋىرىنا الىپ تۋلاعانى دا ەسٸمٸزدە.
سمايىلوۆ مۇنى بٸلە تۇرا, ەۋرازييالىق وداققا مٷشە ەلدەردٸڭ ينۆەستورلارىن قازاقستاننىڭ كٶلٸك-لوگيستيكا سالاسىن دامىتۋعا شاقىرۋىن تٷسٸنە المادىق. تٸپتٸ, مۇنى پروۆوكاتسييا دەپ قابىلداۋعا دا بولار ما ەدٸ?..
دەل قازٸر ەۋرازييالىق وداقتا رەسەيدەن باسقا ەلدەردە ەلٸمٸزگە ينۆەستيتسييا سالا قوياتىن مٷمكٸندٸگٸ جوق. وسىدان-اق سمايىلوۆتىڭ رەسمي مەسكەۋدٸڭ قولايىنا جاعاتىن پرەمەر بولعانىن بايقايسىڭ.
ال جاڭا پرەمەر-مينيستر ولجاس بەكتەنوۆتٸڭ سمايىلوۆ سەكٸلدٸ نامازىن رەسەيگە قاراپ وقىمايتىنى كرەملدٸڭ كەۋدەسٸنە قانجارداي قادالۋدا. سول سەبەپتٸ رەسەيشٸل تەلەگرام ارنالار بەكتەنوۆتى كٷستانالاپ, ۇلارداي شۋلاپ جاتىر.
پۋتيننٸڭ قاس-قاباعىنا قاراپ اقپارات تاراتاتىن ارنالار:
«قازاقستاندا ٷكٸمەت باسىنا كەلگەن بەكتەنوۆ ەكس-پرەزيدەنت نازارباەۆتىڭ ادامدارىن بيلٸك ۆەرتيكالىنان ىعىستىرىپ, استانانى مەسكەۋدەن الىستاتا تٷسەتٸن كادر» دەپ ەڭگٸمە ايتا باستادى.
وسىلايشا پروپوگانديستەر ەسكٸ قازاقستاننىڭ ٶكٸلدەرٸن بەكتەنوۆ ٷكٸمەتٸنە قارسى قويۋعا جانتالاسۋدا. رەسمي مەسكەۋ ەلٸمٸزدٸڭ ساياسي ەليتاسىن «ەسكٸ, جاڭا» دەپ بٶلشەكتەپ قازاقستانداعى ساياسي ىقپالىن ساقتاپ قالۋعا كٷش سالۋدا.
اتقارۋشى بيلٸكتٸڭ تٸزگٸن-شىلبىرىن قولعا العان ولجاس بەكتەنوۆتى رەسەيلٸك ارنالار كٷشتٸك قۇرىلىمداردىڭ ٶكٸلٸ رەتٸندە كٶرسەتۋگە تىرىسىپ باعۋدا.
يە, ونىڭ سوڭعى جىلدارى بەكتەنوۆتىڭ انتيكوردى باسقارىپ, بٸراز جەمقورلاردى ۇستاپ, پرەزيدەنت توقاەۆتىڭ قولىنان گەنەرال- لەيتەنانت شەنٸن العانىن بٸلەمٸز.
بٸراق قازاقتار جاڭا پرەمەر ارنايى قىزمەتتە جۇمىس ٸستەپ, مەسٸموۆ سەكٸلدٸ لاس تٸرلٸككە ارالاسپاعانىن باستى نازاردا ۇستاۋى تيٸس. قايتا كەرٸسٸنشە, مەملەكەت قازىناسىنا قول سالعانداردى قۇرىقتاپ, سىبايلاس جەمقورلىقتىڭ جولىن كەسكەنٸن نازاردا ۇستاۋ ماڭىزدى. بٸزدٸڭشە, ولجاس بەكتەنوۆتى زاڭ سالاسىنىڭ مامانى دەپ قاراستىرۋ كەرەك.
ەندٸ نەگٸزگٸ ەڭگٸمەمٸزگە قايتا ورالساق, پۋتيننٸڭ باستى پروپاگانديستەرٸنٸڭ بٸرٸ مارگاريتا سيمونياننىڭ باقىلاۋىنداعى "بريفينگ" ارناسى بەكتەنوۆتى "استانا مەن مەسكەۋدٸڭ اراسىن الىستاتاتىن تۇلعا" رەتٸندە كٶرسەتۋگە بارىنشا كٷش سالىپتى.
ارنانىڭ اقپاراتىنا سەنسەك, بەكتەنوۆ استانا مەن مەسكەۋدٸڭ اراسىن الىستاتىپ, قىتاي مەن باتىس ەلدەرٸ اراسىنداعى بايلانىسىن كٷشەيتٸپ, قازاقستاندى ورتا ازيياداعى كٶشباسشى ەلگە اينالدىرماقشى.
ەرينە, كەز كەلگەن قازاقستان ازاماتى بۇل باعىتتى قولدايتىنى انىق. كەرەك دەسەڭٸز, بۇل بەكتەنوۆتىڭ ەمەس, پرەزيدەنت توقاەۆتىڭ بٸرنەشە جىلدان بەرٸ جٷزەگە اسىرىپ كەلە جاتقان ساياساتى ەمەس پە? بٸراق كرەمل پروپاگانديستەرٸ بەكتەنوۆتەن سمايىلوۆ جاساي المايتىنىن تٷسٸنبەي وتىر.
راس, بەكتەنوۆ قازاقستاندى جەمقورلىقتان تازارتۋدا كٶپ ەڭبەك سٸڭٸردٸ. ول انتيكوردى باسقارعان ۋاقىتتا نازارباەۆ وتباسىنا جاقىن قايرات ساتىبالدى مەن قايرات بورانباەۆتىڭ ٸشكەن-جەگەنٸن قۇستىرىپ, زاڭ الدىندا ايىبىن موينىنا قويىپ بەردٸ.
جالپى, قاڭتار وقيعاسىنان كەيٸن قازاقستاندا جەمقورلىقپەن كٷرەس, شەتكە شىققان اكتيۆتەردٸ ەلگە قايتارۋ ٸسٸ ٷدەي تٷسۋٸ كٷتٸلگەن جاعداي ەمەس پە? مۇنى حالىق توقاەۆتان دا, بەكتەنوۆتىڭ الدىنداعى ٷكٸمەتتٸ باسقارعان سمايلوۆتان دا تالاپ ەتتٸ.
ايتپاقشى, بەكتەنوۆتىڭ جەمقورلىقپەن كٷرەستە قازاقستاندى ەۋروپا كەڭەسٸندەگٸ كوررۋپتسيياعا قارسى ەلدەردٸڭ توبىنا قوسۋى كرەملدٸڭ بٷيٸرٸنە شانشۋداي قادالعان. ٶيتكەنٸ رەسمي مەسكەۋ قازاقستاننىڭ ەۋرووداق ەلدەرٸمەن ينتەگراتسييالىق قادامدارعا بارۋىن قولدامايتىنىن بٸلەمٸز. بەكتەنوۆ وسى ەرەكەتٸمەن پۋتينگە جاقپاي قالۋى ەبدەن مٷمكٸن.
پۋتيننٸڭ شاشباۋىن كٶتەرٸپ جٷرگەن ماسسا-مەديا بەكتەنوۆ ٷكٸمەتٸ رەسەيمەن اراداعى بايلانىستىڭ جاڭا مودەلٸن قالىپتاستىرادى دەپ قاۋٸپتەنۋدە.
ٶز باسىمىز بەكتەنوۆ ٷكٸمەتٸنٸڭ پۋتيننٸڭ قاس-قاباعىنا قاراماي ەلٸمٸزدٸڭ دەربەس ەكونوميكالىق ساياساتىن جٷرگٸزۋٸنەن ەشقانداي وعاش قىلىق كٶرٸپ تۇرعانىمىز جوق.
رەسەيگە سانكتسييا سالعان باتىس ەلدەرٸمەن اراداعى بايلانىستى سالقىنداتۋ بٸزگە تيٸمسٸز. بۇل رەتتە كرەمل قازاقستان رەسەيدٸڭ ايتقانىنا كٶنٸپ, قوساق اراسىندا جٷرە بەرەتٸن بەلارۋس ەمەسٸن تٷسٸنۋٸ كەرەك.
بۇل بەكتەنوۆتىڭ تاڭداۋى ەمەس, حالىقتىڭ, پرەزيدەنت تاڭداۋى ەكەنٸن كرەمل پروپاگانديستەرٸنٸڭ ەسٸنە سالاتىن كەز جەتتٸ.
