Smanovqa jaýap: qazaq nesieni jetiskennen ala ma? (video)

Ǵalamtor jelisinde imam Ábdiǵappar Smanovtyń nesie týraly aitqan ýaǵyzy kóp tarap, qoǵam tarapynan belgili bir deńgeide narazylyq týǵyzýda.

Óitkeni imam: «Kredittiń árbir paiyzy anańmen jeti ret zina jasaǵan kúnámen birdei» dep salǵan (videosy tómende). Bul basynda bir emes, birneshe nesiesi bar qazaq jurtynyń ashý-yzasyn týǵyzyp jatqan jaiy bar.

Jýrnalist Dáýlethan Jienqulov imam Ábdiǵappar Smanovqa bylai dep jaýap qatypty.

"Nesie alǵan adam anasymen 7 ret oinas jasaǵanmen teń" depti, bir "ǵulama". Ái boiaýshy boiaýshy degenge eldiń bárin úrkite bermeseńdershi, a? Ainalaǵa kózderińdi ashyp qarap, pátýa shyǵarsańdar jón bolar edi.

Áitpese, bilimge krediti nemese kreditke bilim, baspana alǵyń kelse - ippotekalyq kredit, kásip ashqyń kelse - kredit, qyl aiaǵy mal baqqyń kelse de kredit.

Kreditti qarapaiym halyq zina jasaǵysy kelip alyp jatyr dep oilaisyńdar ma? Qazaq qaibir jetiskennen qaryzǵa kirip júr deisiń? Búgingi qaiyrshy tirliginiń betin búrkemeleý úshin, ózin áiteýir bir kásippen aldap, nan tabý úshin, bala-shaǵany jerge qaratpaýy úshin, eki betin sharyq qylyp qaryz alyp, ony qaryzben jaýyp júr. Sóitip, ózi zorǵa júrgen beisharany endi kep, "nesie alǵanyń anańnyń qoinyna qol salǵanyń" degeni qai sasqany?! Nesieni ósimimen berip otyrǵandar týraly áńgime basqa, alǵan adam qyjalat bolǵasyn alady da?! Sheshesine qol júgirtý úshin alady deisiń be? Jalpy, osyny aityp otyrǵandaǵy maqsat ne? Ne piǵyl?

Taǵy bir dúmsheler kelip, myna dúniede azyp-tozyp, birdi birge jalǵap zorǵa kún keship júrgen jurtty ana dúniedegi tozaqpen, qyl kópirmen t.b. qorqytyp, úrkitip, namaz oqymasań anaýsyń, oraza tutpasań mynaýsyń, saqal ósir, murtyńdy qyr, óit búit deidi.

Ái ýaǵyzshylar, osy ákelerimiz, ájelerimiz sender qusap ursyp zekimei-aq, oibailap-baibailamai-aq, tozaǵymen úrkitip, shaitanymen shoshytpai-aq bárimizdi tárbielep ósirip edi ǵoi. Ne boldy, senderge? Oraza men namazdyń, obal men saýaptyń ne ekenin qazaq jaqsy biledi. Ony nege úrkitip ýaǵyzdaýymyz kerek. Jalpy Islam dini myna dúniede kerek pe, álde ana dúnielik din be? Maǵan osyny túsindirińdershi. Nege biz Islamdy tek ana dúniege daiyndyq úshin ǵana kerek qylaýymyz kerek? 
Senderdiń ásiredinshildikterińnen ózimizdiń qazaqy dindarlyǵymyz myń ese artyq. Nesie alamyn!!!

Otbasymdy kóshede qańǵytyp qoimaý úshin - baspana alýǵa, kóringenge qol jaiyp kóshe jaǵalap ketpeý úshin - kásip ashýǵa, balam durys bilim alyp, saýatty bolyp ósýi úshin - bilim alýǵa jáne basqa da qajettilikter úshin, jáne osy nesieni adal tapqan aqshamnan qaitaryp beremin. Al ana dúniege barǵanda eshkim eshkim úshin jaýap bermeidi. Men úshin nemese basqa qazaq úshin jandaryń aýyryp, keńirdekterińdi sozyp, kúre tamyrlaryń bileýlenip "ýaǵyz" aipai aq qoiyńdarshy.

Jurtty jaqsylyqqa, meiirimdilikke, adaldyqqa shaqyrǵandaryńnyń túri osy ma? Osy áńgimelerińmen eldi Islamǵa uiytamyz dep oilaisyńdar ma?

Aita ketelik, Smanovtyń málimdemesine Dini basqarmanyń ózi túsinikteme berýge májbúr bolǵan.

«Jalpy Ábdiǵappar Smanov dini basqarmada imamdar quramynda jumys isteidi.

Bul kisiniń «nesieniń ár paiyzy anańmen jeti ret zina jasaǵanmen kúnámen teń» degen ýaǵyzy durys emes. Iaǵni, Quranda olai jazylmaǵan, al jalpy sol maǵynada aitylǵan hadister bolýy múmkin.

Taǵy bir aitarymyz, nesie týraly múftiiattyń shyǵarǵan arnaiy pátýasy joq. Qazir biz osy máseleni talqylap, daiyndaý ústindemiz.

Bir sózben aitqanda, nesie, ipotekaǵa úi alýǵa bolady. Islam dininiń basty aiyrmashylyǵy sol, onyń árbir sózi zamanǵa sai qoldanylatyndyǵy. Iaǵni, qazirgi ómirde janbaǵys úshin nesie alyp, ony ýaqyty tólese onyń esh aiyby joq», — dedi QMDB Ýaǵyz-nasihat bóliminiń meńgerýshisi Ershat Ońǵarov.

Islamtanýshynyń sózinshe, halyq ýaǵyzshylardyń áńgimesine emes, múftiiat taratqan resmi aqparatqa ǵana senýi kerek.