عالامتور جەلىسىندە يمام ءابدىعاپپار سمانوۆتىڭ نەسيە تۋرالى ايتقان ۋاعىزى كوپ تاراپ، قوعام تاراپىنان بەلگىلى ءبىر دەڭگەيدە نارازىلىق تۋعىزۋدا.
ويتكەنى يمام: «كرەديتتىڭ ءاربىر پايىزى اناڭمەن جەتى رەت زينا جاساعان كۇنامەن بىردەي» دەپ سالعان (ۆيدەوسى تومەندە). بۇل باسىندا ءبىر ەمەس، بىرنەشە نەسيەسى بار قازاق جۇرتىنىڭ اشۋ-ىزاسىن تۋعىزىپ جاتقان جايى بار.
جۋرناليست داۋلەتحان جيەنقۇلوۆ يمام ءابدىعاپپار سمانوۆقا بىلاي دەپ جاۋاپ قاتىپتى.
"نەسيە العان ادام اناسىمەن 7 رەت ويناس جاساعانمەن تەڭ" دەپتى، ءبىر "عۇلاما". ءاي بوياۋشى بوياۋشى دەگەنگە ەلدىڭ ءبارىن ۇركىتە بەرمەسەڭدەرشى، ا؟ اينالاعا كوزدەرىڭدى اشىپ قاراپ، ءپاتۋا شىعارساڭدار ءجون بولار ەدى.
ايتپەسە، بىلىمگە كرەديتى نەمەسە كرەديتكە ءبىلىم، باسپانا العىڭ كەلسە - يپپوتەكالىق كرەديت، كاسىپ اشقىڭ كەلسە - كرەديت، قىل اياعى مال باققىڭ كەلسە دە كرەديت.
كرەديتتى قاراپايىم حالىق زينا جاساعىسى كەلىپ الىپ جاتىر دەپ ويلايسىڭدار ما؟ قازاق ءقايبىر جەتىسكەننەن قارىزعا كىرىپ ءجۇر دەيسىڭ؟ بۇگىنگى قايىرشى تىرلىگىنىڭ بەتىن بۇركەمەلەۋ ءۇشىن، ءوزىن ايتەۋىر ءبىر كاسىپپەن الداپ، نان تابۋ ءۇشىن، بالا-شاعانى جەرگە قاراتپاۋى ءۇشىن، ەكى بەتىن شارىق قىلىپ قارىز الىپ، ونى قارىزبەن جاۋىپ ءجۇر. ءسويتىپ، ءوزى زورعا جۇرگەن بەيشارانى ەندى كەپ، "نەسيە العانىڭ اناڭنىڭ قوينىنا قول سالعانىڭ" دەگەنى قاي ساسقانى؟! نەسيەنى وسىمىمەن بەرىپ وتىرعاندار تۋرالى اڭگىمە باسقا، العان ادام قىجالات بولعاسىن الادى دا؟! شەشەسىنە قول جۇگىرتۋ ءۇشىن الادى دەيسىڭ بە؟ جالپى، وسىنى ايتىپ وتىرعانداعى ماقسات نە؟ نە پيعىل؟
تاعى ءبىر دۇمشەلەر كەلىپ، مىنا دۇنيەدە ازىپ-توزىپ، ءبىردى بىرگە جالعاپ زورعا كۇن كەشىپ جۇرگەن جۇرتتى انا دۇنيەدەگى توزاقپەن، قىل كوپىرمەن ت.ب. قورقىتىپ، ۇركىتىپ، ناماز وقىماساڭ اناۋسىڭ، ورازا تۇتپاساڭ مىناۋسىڭ، ساقال ءوسىر، مۇرتىڭدى قىر، ءويت ءبۇيت دەيدى.
ءاي ۋاعىزشىلار، وسى اكەلەرىمىز، اجەلەرىمىز سەندەر قۇساپ ۇرسىپ زەكىمەي-اق، ويبايلاپ-بايبايلاماي-اق، توزاعىمەن ۇركىتىپ، شايتانىمەن شوشىتپاي-اق ءبارىمىزدى تاربيەلەپ ءوسىرىپ ەدى عوي. نە بولدى، سەندەرگە؟ ورازا مەن نامازدىڭ، وبال مەن ساۋاپتىڭ نە ەكەنىن قازاق جاقسى بىلەدى. ونى نەگە ۇركىتىپ ۋاعىزداۋىمىز كەرەك. جالپى يسلام ءدىنى مىنا دۇنيەدە كەرەك پە، الدە انا دۇنيەلىك ءدىن بە؟ ماعان وسىنى تۇسىندىرىڭدەرشى. نەگە ءبىز يسلامدى تەك انا دۇنيەگە دايىندىق ءۇشىن عانا كەرەك قىلاۋىمىز كەرەك؟
سەندەردىڭ اسىرەدىنشىلدىكتەرىڭنەن ءوزىمىزدىڭ قازاقى ءدىندارلىعىمىز مىڭ ەسە ارتىق. نەسيە الامىن!!!
وتباسىمدى كوشەدە قاڭعىتىپ قويماۋ ءۇشىن - باسپانا الۋعا، كورىنگەنگە قول جايىپ كوشە جاعالاپ كەتپەۋ ءۇشىن - كاسىپ اشۋعا، بالام دۇرىس ءبىلىم الىپ، ساۋاتتى بولىپ ءوسۋى ءۇشىن - ءبىلىم الۋعا جانە باسقا دا قاجەتتىلىكتەر ءۇشىن، جانە وسى نەسيەنى ادال تاپقان اقشامنان قايتارىپ بەرەمىن. ال انا دۇنيەگە بارعاندا ەشكىم ەشكىم ءۇشىن جاۋاپ بەرمەيدى. مەن ءۇشىن نەمەسە باسقا قازاق ءۇشىن جاندارىڭ اۋىرىپ، كەڭىردەكتەرىڭدى سوزىپ، كۇرە تامىرلارىڭ بىلەۋلەنىپ "ۋاعىز" ايپاي اق قويىڭدارشى.
جۇرتتى جاقسىلىققا، مەيىرىمدىلىككە، ادالدىققا شاقىرعاندارىڭنىڭ ءتۇرى وسى ما؟ وسى اڭگىمەلەرىڭمەن ەلدى يسلامعا ۇيىتامىز دەپ ويلايسىڭدار ما؟
ايتا كەتەلىك، سمانوۆتىڭ مالىمدەمەسىنە ءدىني باسقارمانىڭ ءوزى تۇسىنىكتەمە بەرۋگە ءماجبۇر بولعان.
«جالپى ءابدىعاپپار سمانوۆ ءدىني باسقارمادا يمامدار قۇرامىندا جۇمىس ىستەيدى.
بۇل كىسىنىڭ «نەسيەنىڭ ءار پايىزى اناڭمەن جەتى رەت زينا جاساعانمەن كۇنامەن تەڭ» دەگەن ۋاعىزى دۇرىس ەمەس. ياعني، قۇراندا ولاي جازىلماعان، ال جالپى سول ماعىنادا ايتىلعان حاديستەر بولۋى مۇمكىن.
تاعى ءبىر ايتارىمىز، نەسيە تۋرالى ءمۇفتياتتىڭ شىعارعان ارنايى ءپاتۋاسى جوق. ءقازىر ءبىز وسى ماسەلەنى تالقىلاپ، دايىنداۋ ۇستىندەمىز.
ءبىر سوزبەن ايتقاندا، نەسيە، يپوتەكاعا ءۇي الۋعا بولادى. يسلام ءدىنىنىڭ باستى ايىرماشىلىعى سول، ونىڭ ءاربىر ءسوزى زامانعا ساي قولدانىلاتىندىعى. ياعني، قازىرگى ومىردە جانباعىس ءۇشىن نەسيە الىپ، ونى ۋاقىتى تولەسە ونىڭ ەش ايىبى جوق»، — دەدى قمدب ۋاعىز-ناسيحات ءبولىمىنىڭ مەڭگەرۋشىسى ەرشات وڭعاروۆ.
يسلامتانۋشىنىڭ سوزىنشە، حالىق ۋاعىزشىلاردىڭ اڭگىمەسىنە ەمەس، ءمۇفتيات تاراتقان رەسمي اقپاراتقا عانا سەنۋى كەرەك.
[video width="1280" height="720" mp4="https://dalanews.kz/wp-content/uploads/2017/08/مىنا-زاماندا-كرەديتسىز-كۇن-كورۋ-مۇمكىن-بەابدۋگاپپار-سمانوۆ.mp4"][/video]
