مادەنيەت جانە اقپارات ءمينيسترى ايدا بالايەۆا حيدجاب ماسەلەسىنە قاتىستى پىكىر ءبىلدىردى.
«ءقازىر الەۋمەتتىك جەلىدە مەكتەپتەردە حيدجاب كيۋ ماسەلەسىنە قاتىستى تالقى توقتار ەمەس. وسىعان بايلانىستى، ءدىني سالاعا جاۋاپتى لاۋازىمدى تۇلعا رەتىندە، ءوز تاراپىمنان تۇسىنىكتەمە بەرۋدى ءجون كورىپ وتىرمىن.
اتازاڭىمىزعا سايكەس قازاقستاندا ءدىن مەملەكەتتەن بولىنگەن.
ءسوز جوق، مەملەكەت ءدىن بوستاندىعىنا كەپىلدىك بەرەدى. ءبىراق ءبىز – زايىرلى ەلمىز! سول ءۇشىن دە مەملەكەتتىك ساياساتتىڭ بارلىق ماسەلەلەرى ءدىني پاتۋالارمەن ەمەس، ازاماتتىق نورمالارمەن رەتتەلەدى.
ءقۇقىقتىق-نورماتيۆتى اكتىلەر ءاربىر وقۋشىعا مەكتەپ قابىرعاسىندا ارنايى بەكىتىلگەن فورما كيۋدى مىندەتتەيدى. ويتكەنى، ءبىلىم بەرۋ ەرەكشەلىگى ءبىرىڭعايلىقتى تالاپ ەتەدى.
ال كونستيتۋسيامىز بويىنشا مەكتەپتىڭ مىندەتى – ەل ازاماتتارىنا ساپالى ءبىلىم بەرۋگە كەپىلدىك بەرۋ جانە ونى قامتاماسىز ەتۋ.
سوندىقتان دا، مەكتەپتە بالا ەڭ الدىمەن ساپالى ءبىلىم الۋى كەرەك. سودان كەيىن بارىپ، ەرجەتە كەلە ءدىني نانىم-سەنىمىن، قانداي كيىم ۇلگىسىن كيەتىنىن ءوزى شەشەدى دەپ ويلايمىن»، – دەگەن فەيسبۋك جەلىسىندەگى جازباسىندا.
