Qazaqstan-Slovenıa basshylary kólik-logıstıka salasyndaǵy baılanys aıasyn keńeıtý máselesin talqylady, – dep habarlaıdy Dalanews.kz.
Atap aıtqanda, Transkaspıı halyqaralyq kólik dálizi jobasyna Slovenıanyń «Lýka Koper» teńiz portyn qatystyrý jóninde ortaq pikirge keldi. Ózara alys-beristiń kólemin arttyrý úshin prezıdentter quzyrly organdarǵa naqty sharalar qabyldaý týraly tapsyrma berdi. Sondaı-aq Qasym-Jomart Toqaev Qazaqstannyń sý resýrstaryn basqarý isinde sloven tarapynyń ozyq tájirıbesin zerdelep, birlese jumys isteýge daıyn ekenin jetkizdi.
Budan bólek, taraptar mádenı-gýmanıtarlyq yqpaldastyq jaıynda da pikir almasty.
– Bilim, ǵylym jáne mádenıet salalaryndaǵy qarym-qatynasty jandandyrýǵa mol múmkindik bar. Jalpy Slovenıanyń bilim berý júıesi dúnıe júzinde ozyq júıe retinde moıyndalǵan. Sondyqtan biz eki el ýnıversıtetteri arasynda baılanys ornatýǵa múddelimiz. Slovenıanyń Iojef Stefan ınstıtýty Nazarbaev ýnıversıtetimen baılanys ornatýǵa qyzyǵýshylyq tanytyp otyr. Qazaqstan Slovenıanyń joǵary oqý oryndarymen jáne zertteý ortalyqtarymen yntymaqtastyqty nyǵaıtýǵa daıyn, – dedi Memleket basshysy.
Taraptar halyqaralyq jáne aımaqtyq ózekti máselelerdi talqylap, ustanymdarynyń ortaq ekenin jetkizdi.
– Qazirgi geosaıası jaǵdaı óte kúrdeli. Prezıdent Pırs-Mýsar ekeýimiz álemdegi qaqtyǵystardy Birikken Ulttar Uıymy Jarǵysy men halyqaralyq quqyq qaǵıdattaryna saı beıbit jolmen sheshý qajet ekenin quptadyq. Kópjaqty qurylymdar aıasyndaǵy yqpaldastyqty odan ári kúsheıtýge múddeli ekenimizdi rastadyq. Almatyda Ortalyq Azıa men Aýǵanstan úshin Ornyqty damý maqsattary jónindegi Birikken Ulttar Uıymynyń aımaqtyq ortalyǵyn ashý týraly bastamany qoldaǵan Slovenıa tarapyna rızashylyǵymdy bildiremin. Jalpy búgingi kelissózder jemisti boldy dep kúmánsiz aıtýǵa bolady. Osy sapardyń nátıjesinde qazaq-sloven yqpaldastyǵy nyǵaıyp, jańa deńgeıge kóteriledi dep senemin. Birlesken kúsh-jigerimizdiń arqasynda biz ortaq maqsattarǵa qol jetkizemiz, – dedi Qasym-Jomart Toqaev.
