– ءبىلىم، عىلىم جانە مادەنيەت سالالارىنداعى قارىم-قاتىناستى جانداندىرۋعا مول مۇمكىندىك بار. جالپى سلوۆەنيانىڭ ءبىلىم بەرۋ جۇيەسى دۇنيە جۇزىندە وزىق جۇيە رەتىندە مويىندالعان. سوندىقتان ءبىز ەكى ەل ۋنيۆەرسيتەتتەرى اراسىندا بايلانىس ورناتۋعا مۇددەلىمىز. سلوۆەنيانىڭ يوجەف ستەفان ينستيتۋتى نازاربايەۆ ۋنيۆەرسيتەتىمەن بايلانىس ورناتۋعا قىزىعۋشىلىق تانىتىپ وتىر. قازاقستان سلوۆەنيانىڭ جوعارى وقۋ ورىندارىمەن جانە زەرتتەۋ ورتالىقتارىمەن ىنتىماقتاستىقتى نىعايتۋعا دايىن، – دەدى مەملەكەت باسشىسى.

– قازىرگى گەوساياسي جاعداي وتە كۇردەلى. پرەزيدەنت پيرس-مۋسار ەكەۋىمىز الەمدەگى قاقتىعىستاردى بىرىككەن ۇلتتار ۇيىمى جارعىسى مەن حالىقارالىق قۇقىق قاعيداتتارىنا ساي بەيبىت جولمەن شەشۋ قاجەت ەكەنىن قۇپتادىق. كوپجاقتى قۇرىلىمدار اياسىنداعى ىقپالداستىقتى ودان ءارى كۇشەيتۋگە مۇددەلى ەكەنىمىزدى راستادىق. الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى بىرىككەن ۇلتتار ۇيىمىنىڭ ايماقتىق ورتالىعىن اشۋ تۋرالى باستامانى قولداعان سلوۆەنيا تاراپىنا ريزاشىلىعىمدى بىلدىرەمىن. جالپى بۇگىنگى كەلىسسوزدەر جەمىستى بولدى دەپ كۇمانسىز ايتۋعا بولادى. وسى ساپاردىڭ ناتيجەسىندە قازاق-سلوۆەن ىقپالداستىعى نىعايىپ، جاڭا دەڭگەيگە كوتەرىلەدى دەپ سەنەمىن. بىرلەسكەن كۇش-جىگەرىمىزدىڭ ارقاسىندا ءبىز ورتاق ماقساتتارعا قول جەتكىزەمىز، – دەدى قاسىم-جومارت توقايەۆ.