Qazaqstan úkimeti eldegi benzin men dizel otynynyń baǵasyn kórshi eldermen teńestirý úshin birtindep ósiretin boldy. Bul týraly Úkimette ótken baspasóz máslihatynda premer-ministrdiń orynbasary Roman Skliar málimdedi, dep habarlaidy Dalanews.kz.
Roman Skliar úlken munai qorynyń baryna qaramastan Qazaqstanda munai ónimderi áli de jetkiliksiz óndiriletinin basa atap ótti.
"2017-2019 jyldary biz úsh MÓZ-di qaita jóndep, qurylymdaýdy aiaqtadyq, sóitip janar-jaǵarmai óndirisi kólemin edáýir arttyrdyq. Osy ýaqytqa deiin boi kórsetip kelgen benzin, dizel, aviakerosin tapshylyǵy kilt tyiyldy. Alaida, aviakerosin tutynysynyń aitarlyqtai artýyna bailanysty bizde jetispeýshilik seziledi, sondyqtan ony syrttan satyp alamyz", - dedi ol.
Onyń aitýynsha, otandyq óndiristi ulǵaitý josparda bar.
"Bizdegi benzin men dizel kórshi memlekettermen salystyrǵanda tym arzan. Sonyń saldarynan sheteldik tranzittik kólikter janarmaidy bizden toltyryp áketip jatyr. Sondyqtan otyn baǵasyn birtindep teńestiremiz. Sonymen qatar, josparda munai óńdeý kólemin 6-dan 12 mln tonnaǵa deiin ulǵaitýǵa múmkindik beretin Shymkent MÓZ qurylysynyń ekinshi kezeńi jáne qoldanystaǵy Pavlodar jáne Atyraý zaýyttarynda ónimdilikti arttyrý jónindegi is-sharalar qarastyrylǵan", – dedi vitse-premer Skliar.
Aita keteiik, elde otyndy zańsyz eksporttaý kólemi 50 paiyzǵa qysqarǵan. Bul týraly Ishki ister ministrligi, UQK shekara qyzmeti jáne Memlekettik kirister komiteti birlesip ótkizgen jiynda aityldy. Jaýapty organdar "Peretok" operatsiiasynyń nátijesinde "kóleńkeli" janarmai eksportyna qarsy kúreste osyndai kórsetkishke qol jetkizgen.
